Berdibek Saparbaev Balalardy qoldaý ortalyǵyn ashýdy usyndy
AQTÓBE. QazAqparat - Aqtóbe oblysynyń ákimi Berdibek Saparbaev Balalardy qoldaý ortalyǵyn ashýdy usyndy, dep habarlaıdy QazAqparat tilshisi.
Aqtóbede oblystyq bilim basqarmasynyń keńeıtilgen alqa májilisi ótti. Ótken jyldy qorytyndylap, 2018 jyldyń jospary qurylǵan jıyn kezinde óńir basshysy Berdibek Saparbaev birqatar tapsyrmalar júktedi. Máselen, sońǵy jyldary Alǵa balalar úıindegi tárbıelenýshiler sany kúrt tómendegen. Aldaǵy ýaqytta ýaqytsha beıimdeý ortalyǵy men balalar úıi biriktirilip, bir mekeme qurylýy múmkin. Bul usynysty óńir basshysy B.Saparbaev ta qoldady.
«Balalar úıiniń ataýyn ózgertetin ýaqyt jetti. Qazirgi kezde Alǵa balalar úıinde152 bala tárbıelenip jatyr. Bálkim Balalardy qoldaý ortalyǵyn ashýǵa bolatyn shyǵar. Biz balalar úıin múlde jabý úshin jumys isteımiz. Balalardy patronattyq tárbıege berip, olardyń otbasynda tárbıe alýyna kúsh salýymyz qajet. «Meıirim» ortalyǵy da ashyldy. Qazir biz úshjaqty memorandýmǵa qol qoıýdy mindettep jatyrmyz. Demeýshi ári qorǵanshy, bala men Turǵyn úı qurylys jınaq banki bar. Balalar oqý ornyn bitirgen soń páterli bolýy úshin jumys isteımiz»,- dedi Aqtóbe oblysynyń ákimi Berdibek Saparbaev.
Aıta keteıik, sońǵy 10 jylda Aqtóbe oblysynda 300-den astam jetim bala baspanaly boldy. Qazirgi kezde 3 myńnan astam ata-ana qamqorlyǵynsyz qalǵan, jetim bala páter kezeginde tur.
«Barlyǵy 941 jetim balaǵa áleýmettik patronattyq súıemeldeý bekitilip, olardyń esepshottaryna jalpy somasy 62 mıllıon teńge jınaldy. Baǵdarlama sheńberinde 14 bala baspanaly bolyp, 14 bala qujatyn qaıta daıyndap jatyr. Áıteke bı, Qarǵaly, Yrǵyz aýdandary balalardyń esepshotyn tolyqtyrýda nashar jumys júrip jatyr»,- dedi Aqtóbe oblystyq bilim basqarmasynyń basshysy Lázzat Orazbaeva.
