Berdibek Saparbaev aýyl sharýashylyǵyna jaýapty basshylardyń jumysyn synady
AQTÓBE. QazAqparat - Aqtóbe oblysynyń ákimi Berdibek Saparbaev mal basyn arttyrý, et pen súttiń óndirisi men olardy óńdeý salasyndaǵy jumystardy synǵa aldy. Memlekettik baǵdarlamalarmen bólingen qarjynyń ıgerilýi máselesin kóterdi, dep habarlaıdy QazAqparat tilshisi.
Aýyl sharýashylyǵy salasyn damytý azyq-túlikpen qamtamasyz etýge, baǵa turaqtylyǵyn saqtaý múmkindik beredi. Memlekettik baǵdarlamalardyń iske asyrylýy men qarjynyń ıgerilýin tyńdaǵan óńir basshysy Berdibek Saparbaev jumystyń kemshin tustaryn aıtyp berdi.
«Memleket basshysynyń azyq-túlik qaýipsizdigin jáne ımportty almastyrýdy qamtamasyz etý jónindegi tapsyrmasyna sáıkes óńirde mal sharýashylyǵyn damytý boıynsha jumystar júrgizilýde, biraq, qorytyndy tsıfrlarǵa qarasaq, aıtarlyqtaı tıimdi bolmaı otyr. Máselen, bizdiń oblystaǵy 30 mıllıon gektar jerdiń 25 mıllıony aýyl sharýashylyǵyna jaramdy, biraq belgisiz sebeptermen biz tek 10 mıllıon gektardy ǵana paıdalanamyz. Mal jaıylymy úshin 20 mıllıon gektardan 9 mıllıon gektary ǵana paıdalanylady. Osy jáne basqa da kórsetkishter biz qolda bar áleýetti tolyq jarata almaı otyrǵandyǵymyzdy kórsetedi. Shuraıly jer, sý qoımalary, qolaıly klımat bola tura maldyń ósýi nelikten 1,5-4% aspaıdy? Kóptegen óńirde mundaı múmkindik joq. Aýyl sharýashylyǵy taýaryn óndirýshilerge jaqsy qoldaý bolatyn memlekettik baǵdarlamalar bar, biraq ony ıgerý jaǵy kemshin», - dedi oblys ákimi Berdibek Saparbaev.
Aqtóbe oblysy ákiminiń baspasóz qyzmeti jıyn kezinde aýyl sharýashylyǵynyń dástúrli emes túrlerin jáne aýyl sharýashylyǵy kooperatıvterin damytý týraly aıtylǵanyn habarlady.
Oblystyq ekonomıka jáne bıýdjetti josparlaý basqarmasynyń bastyǵy Oljas Smaǵulovtyń aıtýynsha, segiz aıda jylqy malynyń basy - 7,1%, qus sany - 18,5%, eshki - 7%, iri qara mal - 4,3%, qoı 1,4% artty. Jyl basynan beri mal ónimderiniń aınalymy 77,9 mlrd. teńgeni qurady. Qazirgi kezde óńirde qýattylyǵy jylyna 21,5 myń tonnany quraıtyn 11 et óńdeý kásiporny bar. Olardyń ortasha júktemesi 61%. Al 6 sút óńdeý tsehynyń júktemesi 18 paıyzǵa ǵana jetken. Jospar boıynsha jalpy quny 10,7 mlrd teńgeni quraıtyn 23 ınvestıtsııalyq joba júzege asyrylady.
«Mal sharýashylyǵy - ekonomıkany damytýdyń negizgi baǵyttarynyń biri. Biz ózimizdi-ózimiz azyq-túlikpen qamtamasyz etýimiz kerek. Qolda bar áleýetti paıdalanýdyń egjeı-tegjeıli josparyn ázirleý qajet. Bul bizdiń basty mindetimiz », - dedi oblys ákimi B.Saparbaev.
