Berdibek Saparbaev aýdan ákimderine: Kabınette otyrmaı, aýylǵa baryp adamdarmen kezdesińizder
TARAZ. QazAqparat – Jambyl oblysynyń ákimi Berdibek Saparbaev kezekti apparattyq keńeste aýdan ákimderiniń saladaǵy ınvestıtsııa tartý oıynsha álsiz jumystaryn synǵa aldy, dep habarlaıdy QazAqparat tilshisi.
Aýyl sharýashylyǵy basqarmasynyń basshysy Qaırat Amanov iske asyrylǵan jobalar men aldaǵy josparlar, sondaı-aq agrosektorǵa ınvestıtsııa salýǵa kedergi keltirip otyrǵan máseleler týraly jan-jaqty baıandady.
2020 jyly Jambyl oblysynda aýyl sharýashylyq salasynda 29,5 mıllıard teńge tartylyp, 2019 jylmen salystyrǵanda ósim 113 paıyzdy qurady
Jappy, óńirde byltyr 18 joba iske asyryldy desek, olardyń beseýi mal sharýashylyǵyn damytýǵa, altaýy – ónimdi qaıta óńdeýge, tórteýi – ıntensıvti baqtar qurýǵa, úsheýi – qus sharýashylyǵyna qatysty.
Qaırat Amanovtyń oń boljamdaryna qaramastan, aımaq basshysy Berdibek Saparbaev aýdandar men Taraz qalasynyń ákimderine agrosektorǵa ınvestıtsııa tartýǵa qatysty kóptegen suraq joldady.
Investıtsııalar tartý men aýylsharýashylyq tehnologııalarynyń jańa túrlerin engiziýdin mańyzdylyǵyn atap ótken oblys ákimi árbir jobany muqııat zerdeleýdi, ony iske asyrý barysynda ınvestordyń qandaı kedergilerge kez bolyp jatqanyn anyqtaýdy jáne qoldaý kórsetýdi tapsyrdy. Berdibek Saparbaev bıyl kem degende 34 mıllıard teńge ınvestıtsııa tartý kerektigin tilge tıek etip, tıisti tulǵalarǵa tapsyrma júktedi.
«Aýyl sharýashylyǵy salasynda ınvestorlardy tartýǵa qatysty ahýal aýyz toltyryp aıtarlyqtaı emes. Agrarlyq óńir úshin 29,5 mıllıard teńge ınvestıtsııa óte az. Bizge sala ınvestorlaryna degen jańasha kózqaras qajet. Bul basym baǵyttardyń biri bolýy tıis, ınvestorlardy tartý úshin barlyq jaǵdaı jasalýy kerek», - dedi óńir basshysy.
Ol jeke ınvestıtsııalardy tartý áleýmettik máselelerdi de sheshýdiń tıimdi kózi ekenin basa aıtty.
«Kabınette otyryp, ózderińizdi úlken bastyq sezinbeı, aýyldyq okrýgterge baryńyzdar, adamdarmen kezdesińizder. Esterińizde bolsyn, ınvestıtsııa tartýǵa ınvestorlar emes, biz múddelimiz», - dedi Berdibek Saparbaev ákimderge.
Sonymen qatar, oblys ákimi sýarýdyń zamanaýı tehnologııalaryn engizý jáne aýyl sharýashylyǵy tehnıkalary parkin jańartý boıynsha jumystardy jalǵastyrýdy tapsyrdy.
