Berdibek Saparbaev ardagerlerdi qarttar kúnimen quttyqtady

TARAZ. QazAqparat – Qarttar kúnine oraı Taraz qalasyndaǵy Sherhan Murtaza atyndaǵy «Rýhanııat jáne tarıhtaný» ortalyǵynda ardagerlerge qurmet kórsetildi. Merekege oraı soǵys ardagerleri, túrli salanyń eńbek sińirgen qyzmetkerleri, oblystyń jáne qalanyń qurmetti azamattary shaqyryldy, dep habarlaıdy QazAqparat tilshisi.

Jambyl oblysynyń ákimi Berdibek Saparbaev jınalǵandardy merekemen quttyqtap, zor densaýlyq, uzaq ómir tiledi. Óńir basshysy zeınet demalysyna shyqqan ardagerlerdiń

qoǵamdaǵy beıbitshilik pen kelisimdi saqtaýǵa óz úlesterin qosyp júrgenin atap ótti. Olar ózderiniń ómirlik tájirıbelerin bólise otyryp, jastardy durys jolǵa baǵyttap keledi.

«Táýelsizdik jyldary Qazaqstan ekonomıkasy men demokratııalyq negizi damyp kele jatqan qýatty memleketke aınaldy. Bul úshin biz aǵa býyn aldynda qaryzdarmyz. Men únemi aıtyp kelemin, jastar ózderine ómir syılaǵan, tárbıe men bilim bergen úlkenderdi umytpaýy tıis. Qart adamdarǵa qurmet pen qamqorlyq tek osyndaı mereke kúnderi ǵana emes, udaıy kórsetilýi kerek», - dep atap ótti Berdibek Saparbaev.

Sondaı-aq ol memleket ardagerlerge árdaıym qamqorlyq tanytyp, olardyń eshteńege muqtaj bolmaýy úshin tıisti jaǵdaı jasap otyrǵandyǵyn basa aıtty.

«Prezıdent Qasym-Jomart Toqaev Qazaqstan halqyna Joldaýynda ómir súrý uzaqtyǵyn 75 jasqa deıin jetkizý úshin densaýlyq saqtaý salasyn odan ári damytý boıynsha sharalar

qabyldaýdy tapsyrdy. Búginde bizdiń oblysymyzda 100 jastan asqan 20 ardager jáne 90 jastan asqan 1085 zeınetker turady», - dep atap ótti ol.

Oblystyq ardagerler keńesiniń tóraǵasy Erkinbek Soltybaev ardagerlerge salaýatty ómir saltyn nasıhattaý jáne óskeleń urpaqty qazaqstandyq patrıotızm rýhynda tárbıeleýdegi orasan zor jumystary úshin alǵys aıtty.

Áńgime barysynda bastan keshken qıyndyqtar, áskerı erlikter, jetistikter, rýhanı qundylyqtar týraly aıtyldy. Qarttar lebizderin bildirip, súıikti ánderin shyrqady.

«Uzaq jyldar boıy óńirdiń ıgiligi jolynda eńbek etken qarııalarǵa udaıy kóńil bólinedi. Búgingi merekege oraı kezdesý uıymdastyryp, ótkenimizdi eske túsirip, bir serpilip qalýǵa múmkindik bergenderińiz úshin rahmet», - dedi jýrnalıstıka ardageri, Qazaqstan

Respýblıkasynyń eńbek sińirgen qaıratkeri Battal Jańabaıuly.

Kezdesýge qatysýshylar túrli máseleler boıynsha oılaryn ortaǵa saldy. Olar oblys ortalyǵy adam tanymastaı ózgergenin tilge tıek etip, kóne Taraz týrıster úshin tartymdy ortalyqqa aınalatyndyǵyna senim bildirdi.

Sondaı-aq, jınalǵandar ózderin tolǵandyryp júrgen máselelerdi de jetkizdi. Oblys ákimi barlyǵyn muqııat tyńdap, olardy sheshýge ýáde berdi.

Sondaı-aq bul kúni Berdibek Saparbaev Ardagerler úıine at basyn buryp, ardagerler keńesiniń jumysymen tanysty.