Berdibek Saparbaev áleýmettik jelilerdegi aryz-shaǵymdy baqylap otyrady

Aqtóbe oblysynyń ákimi Berdibek Saparbaev barlyq áleýmettik jelini ózi baqylap otyrady. Búgin Aqtóbe qalasy ákimi Іlııas Ispanovtyń esep berý kezdesýine qatysqan oblys basshysy qala joldary men tazalyqqa jaýapty basshylardy tyńdady. Máselen, Sáńkibaı batyr dańǵyly men qalanyń eski bóligindegi Zaýyt, Krasnoşekov jáne Beıbitshilik kósheleriniń sýretterin kórsetip, jóndeý josparlaryn surady. Aldaǵy ýaqytta Sáńkibaı batyr kóshesi keńeıtilýi múmkin. Al qala kóshelerindegi oı-shuńqyrlar ázirge tastarmen jamalyp, júrgizýshilerdiń kedergisiz júrýine jaǵdaı jasalady. Negizgi qurylys jumystaryna bıyl 1,9 mıllıard teńge bólindi. Bul qarjyǵa 50 kóshe jóndeledi. Jeteýi ótken jyly bastalyp, aıaqtalmaı qalǵan nysandar, 34-i ortasha jóndelgen. Sonymen qatar, ótken jyly aıtylyp, bıyl iske asyrylatyn sýaǵar júıesiniń qurylysy Batys-2 aýdanynan bastalady.

«Biz sýaǵar júıesi úshin 16 joba daıyndaǵan edik. Qazir bir joba boıynsha konkýrs ótti. Ekeýiniń qujaty daıyn»,- dedi qala ákiminiń orynbasary Jandos Baıyrhanov.

Áleýmettik jelilerdegi aryz-shaǵymdy taǵy bir sholyp shyqqan oblys ákimi kóshe jaryqtandyrý máselesiniń bir izge túspegenin aıtty. Tipti, ótken jyly dıodty shamdarǵa aýystyrylǵan Keńes Nokın dańǵylyndaǵy baǵanalardyń keıbiri túnde iske qosylmaıdy.

«Ótken jylǵa qaraǵanda shaǵym azaıdy. Qala turǵyndary kóktemde jol jóndeý jumystaryn júrgizý múmkin emes ekenin túsinýi kerek. Qazir tek tastarmen joldy tegistep, kóliktiń kedergisiz ótýine jaǵdaı jasaı alamyz. Áleýmettik jelide kóshe tazalyǵy da aıtylady. Kóshelerdi baqylaýǵa alý kerek. Qoqys shashylyp jatyr. Ony sol mańdaǵy bıznes nysandary men basqarýshy kompanııalardyń baqylaýyna bergen jón»,- dedi Saparbaev.

Aıta keteıik, bul baǵyttaǵy jumystar úshin qalalyq ákimdik tehnıkany jańartýdy jón kórgen. Bıyl 1,2 mıllıard teńgege 85 tehnıka satyp alynady. Sonymen qatar, kóshelerge taǵy 345 eýrokonteıner qoıylady.