Berdibek Saparbaev Aqtaý emhanalarynyń jumysymen tanysty

AQTAÝ. QazAqparat - Búgin QR Premer-Mınıstriniń orynbasary Berdibek Saparbaev Mańǵystaý oblysyndaǵy jumys sapary barysynda Aqtaý qalasyndaǵy emhanalardy kórdi, dep habarlaıdy QazAqparat oblys ákiminiń baspasóz qyzmetine silteme jasap.

Berdibek Saparbaev aldymen Aqtaý qalalyq №2 emhanasynda boldy. Emhana basshysy Bektibaı Tólegenov naýqastardy qabyldaý tártibi, emhana múmkindikteri, medıtsınalyq qyzmetkerlerdiń jalaqysy týraly baıandap berdi. Úkimet basshysynyń orynbasary emhanaǵa kelgen naýqastarmen tildesip, medıtsınalyq qyzmet kórsetýdiń sapasy týraly surady. Kezdesý Mańǵystaý oblystyq aýrýhanasynda jalǵasyn tapty.

Shara barysynda «Áleýmettik medıtsınalyq saqtandyrý qory» Basqarma tóraǵasy Aıbatyr Jumaǵulov Mańǵystaý oblysynyń medıtsınalyq saqtandyrýǵa qanshalyqty daıyn ekendigin jetkizdi. «Mańǵystaýda 99 paıyz turǵyn saqtandyrylǵan statýsyn alyp otyr. Bul kórsetkish basqa aımaqtarǵa qaraǵanda áldeqaıda joǵary», - dep atap ótti Aıbatyr Nyshanbaıuly. Onyń keltirgen derekteri boıynsha, Mańǵystaýda shamamen 15 myń adamnyń mártebesi jańartylǵan joq.

«Búgingi tańda 2018 jyldyń basynda mártebege ıe bolǵan 2,7 mln adamnyń 2 mln-nan astamy (nemese 74,6%) memlekettik organdardyń derekqorynda anyqtaldy. Biz bul adamdardyń mártebesin aıqyndaý úshin jergilikti oryndaýshy organdarmen úlken jumys júrgizdik. Qalǵan 700 myńǵa jýyq adamdy rásimdeý osy jyldyń sońyna deıin aıaqtalady», - deıdi ol.

Berdibek Saparbaev medıtsınalyq saqtandyrý júıesiniń artyqshylyqtaryna toqtaldy.

«Álem tájirıbesinde bar bul júıege biz de ótýimiz kerek. Áskerı qyzmetkerler men memlekettik qyzmetkerlerden keıin, ant beretin maman ıeleri – dárigerler. Sol sebepti dárigerler antqa adal bolýy tıis», - dedi QR Premer-Mınıstriniń orynbasary orynbasary.