Berdibek Saparbaev ákimderge muqııat bolýdy eskertti
AQTÓBE. QazAqparat - Aýa raıynyń erteń qalaı bolatynyn bilmeımiz. Kúrt ózgerip ketýi múmkin. Qazir qolda bar málimetke súıenetin bolsaq, qardyń qalyńdyǵy ótken jyldan eki ese az. Bul týraly oblys ákimi Berdibek Saparbaev sý tasqynyna qarsy kúres jumystaryna baǵyttalǵan jıynda aıtty, dep habarlaıdy QazAqparat tilshisi.
Aqtóbe oblysyndaǵy úsh iri sý qoımasy qazir jartylaı toldy. Oblystyq TJD bastyǵy Baýyrjan Syzdyqovtyń aıtýynsha, eger kún tez jylynyp, qar jyldam erise, Aqtóbe sý qoımasy tolyp, 85 mıllıon tekshe metr sý artyq jınalýy múmkin. Bul «Qazgıdromet» jáne «QazSýShar» memlekettik kommýnaldyq kásiporyndarynyń málimetterine saı shyǵarylǵan sheshim. Al Qarǵaly sý qoımasynda eshqandaı qaýip joq.
«Ótken jyly bolǵan jaǵdaıdy esimizden shyǵarǵan joqpyz. Búgin Aqtóbe qalasyna qaýip tóndiredi degen jerlerdi araladyq. Qalaǵa, qala turǵyndaryna qaýip tóndiretin Qarǵaly, Elek ózenderi men olarǵa quıatyn kishkentaı birneshe ózen bar. Aýa raıynyń erteń qalaı bolatynyn bilmeımiz. Kúrt ózgerip ketýi múmkin. Qazir qolda bar málimetke súıenetin bolsaq, qardyń qalyńdyǵy ótken jyldan eki ese az. Úsh sý qoımasy da 50 paıyzǵa tolmaǵan. Biraq jerdegi toń 20-150 santımetrge deıin jetken. Erteń aýa raı tez jylynsa, qar tez erip, sýdyń baratyn jeri bolmaı qalady. Jumysty pysyqtap, zertteý kerek. Ótken jyldan sabaq alyp, sý jınalatyn jerlerdi bilemiz. Tekserý, tazalaý jumysy júrip jatyr. Aqtóbe qalasy ǵana emes Hromtaý, Yrǵyz, Qarǵaly aýdandarynda da qaýipti aýmaqtar bar»,- dedi oblys ákimi Berdibek Saparbaev.
Jıyn kezinde óńir basshysy aýdan ákimderi men orynbasarlaryna, tótenshe jaǵdaılar qyzmetine jumysty úzdiksiz júrgizýge tapsyrma berdi.
«Sınoptıkter apta saıyn boljamdy durys berýi kerek. Sý sharýashylyǵy mekemesi de apta saıyn qoımalaryndaǵy jaǵdaıdy baıandaýy tıis. Sý ótetin arnalardy erteń tazartamyz dep otyra berýge bolmaıdy. Kún raıy kúrt ózgerip tur. Shyǵysta tez kún jylyp ketetinin kim bilgen? Sondyqtan ákimder men orynbasarlary aıaǵymen júrip, kózimen kórip, qajet bolsa, qolymen ustap kórýi tıis. Qubyr tazartyldy ma, ol jerden sý óte ma? Bárin bilip otyryńdar»,- dedi oblys ákimi Berdibek Saparbaev.
Aıta keteıik, Aqtóbe oblysynda 43 eldi mekendi sý basý qaýpi bar. Ol aýyldarda 12 myńnan astam adam turady. Oblysta 290 myń tekshe metr qar shyǵaryldy. Janar-jaǵarmaı, ınertti materıaldar daıyndaldy.
