Berdibek Saparbaev Ábý-Dabı Plaza jumysshylarynyń narazylyq tanytý sebebin aıtty
NUR-SULTAN. QazAqparat - QR Eńbek jáne halyqty áleýmettik qorǵaý mınıstri Berdibek Saparbaev Ábý-Dabı Plaza jumysshylarynyń narazylyq tanytý sebebin aıtty, dep habarlaıdy QazAqparat tilshisi.
"Ábý-Dabı Plazaǵa qatysty aıtar bolsam, tańerteńnen ol jerde qala ákiminiń orynbasary, eńbek ınspektsııasy jáne baqylaý komıteti tóraǵasynyń orynbasary boldy. Bastapqyda mynadaı talaptary boldy. Birinshisi túski asqa qatysty. Jumys berýshi túski asqa 500 teńge tóleıdi. Sheteldik jumysshylar arnaıy ashanada tamaqtanady. Al qazaqstandyqtar 500 teńgeniń az ekendigin aıtyp, ústemeleýdi surap otyr. Ekinshisi jumys ýaqytyna qatysty. Úshinshisi jalaqyǵa qatysty boldy", - dedi mınıstr Ortalyq kommýnıkatsııalar qyzmetindegi brıfıngte.
Onyń aıtýynsha, qazirgi ýaqytta arnaıy komıssııa qurylǵan. Osy komıssııa oryn alyp otyrǵan oqıǵanyń mán-jaıyn anyqtaıtyn bolady.
"Komıssııa qazaqstandyq jumysshy qansha, sheteldik jumyssha qansha jalaqy alatynyn anyqtaıdy. Eńbek kodeksine sáıkes, eger eńbek etý jaǵdaıy barlyǵyna birdeı bolsa, onda jalaqy da birdeı tólenýi kerek. Sondyqtan bul jerde qandaıda buzýshylyq bolsa, onda biz quqyq qorǵaý organdarymen birge shara qoldanamyz. Shyndyǵyna keler bolsaq, Ábý-Dabıge, jalpy osy máselege sońǵy núkte qoıý kerek", - dedi Berdibek Saparbaev.
