Berdenov isi: Sotta istiń mán-jaıy aıtyldy

ShYMKENT. KAZINFORM — Sot tyńdalymynda qastandyqtyń jaı-japsary aıtyldy. 

Shymkent qalasynyń qylmystyq ister jónindegi mamandandyrylǵan aýdanaralyq sotynda qala ákiminiń orynbasary Rýslan Berdenovke jasalǵan qastandyq isi boıynsha basty sot talqylaýy jalǵasyp jatyr. Sotta kýágerler Gaýhar Nurjanova men Baǵlan Momynovtan jaýap alyndy.

— Bir dybys estildi. Áýeli maǵan bul otshashý sekildi estildi. Biraq qasymdaǵy qurbym tez áreket etip, «jat» dep aıqaılady. «Jedel járdem» dep aıqaılaǵan daýys shyqty. Eń birinshi bolyp júgirip bardym. Jaralanǵan adamnyń qasyna jaqyndadyq. Jer qan bolyp jatty. Ústinde aq kóılek boldy, qan bolǵany kórinip turdy. Kálıma aıtyp jatty. Jedel járdem kelgenshe qasynda boldyq. Ernar Jıembaı jerde jatty, ony er adam ustap otyrdy, — dep málimdedi sotta kýáger Gaýhar Nurjanova.

Kelesi kýáger, Ernar Jıembaıdyń dosy Baǵlan Momynov, sol kúni bolǵan oqıǵany baıandap berdi.

— Ol meniń jaqyn dosym, biz otbasymyzben aralasamyz. Sol kúni ol maǵan úıiniń mańyna kelýimdi ótindi. Óz kóliginen bir sómke alyp, meniń júksalǵyshyma saldy. Sómkeniń ishinde ne bar ekenin men qaraǵan joqpyn. Odan keıin meshitke baryp, namaz oqydym. Shyqqan soń birden úıime kettim. Oǵan ańǵa bara almaıtynymdy, basqa josparym bar ekenin túsindirdim. Bul oqıǵa jaıly tek teledıdardan bildim, — dedi sotta kýáger Baǵlan Momynov.

Sondaı-aq, sol kúni áriptesi Aslan Jetpisbaevpen birge júrgenin aıtty. Al, keıin kóliktiń júksalǵyshynan sómkeni alyp ketkenin bilgenin jetkizdi.

Aıta keteıik, budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz.

21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.

Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.