Berdenov isi: Rýslan men Ernardyń birinshi kezdesýinde jeke basqa qatysty áńgime aıtylǵan joq

ShYMKENT. KAZINFORM — Shymkent qalasy ákiminiń orynbasary Rýslan Berdenovke qatysty qylmystyq is boıynsha ótip jatqan sot tyńdalymynda kýáger retinde qalalyq sáýlet jáne qurylys bóliminiń burynǵy ınspektory Asanbaı Ahmentaev jaýap berdi.

Sotta oǵan: «Eki tarap eki ret kezdesken, sonyń bireýine siz qatysqan ekensiz. Sol kezdesýde moraldyq qysym nemese kemsitýshilik boldy ma?» degen suraq qoıyldy.

— Men shyndyqty aıtýǵa ant berdim. Jeke basqa tıise sóıleý, kemsitý, áıeli, bala-shaǵasy týraly áńgime múlde bolǵan joq. Ol jerde tek kıim úlgisi týraly eskertý aıtyldy. Qalanyń ákiminiń orynbasary — saıası laýazym ıesi, sondyqtan qabyldaýyna kirgende belgili bir kıim formasy saqtalýy kerektigin eskertti. Odan keıin «prezentatsııa osy ma, bulaısha ekeýmiz jumys isteı almaımyz» dedi. Artyq sóz bolǵan joq, — dedi kýáger.

Ahmentaevtyń aıtýynsha, ekinshi kezdesýge ol qatyspaǵan, ol kezde Ernar Jıembaı 5–10 mınýtqa ǵana kirip shyqqan.

Sondaı-aq kýáger Rýslan Berdenovtyń Qytaı men Pákistanǵa issaparǵa barýy josparlanǵanyn aıtty. Alaıda ol: «Іssapar shyǵynyn almaı-aq qoıaıyn, áıtpese bılettiń aqshasyna halyqtyń qarjysyna ushyp júr degen oı qalyptasyp qalýy múmkin» degen usynysyn bildirgen.

Aıta keteıik, budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz.

21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.

Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.