Berdenov isi: Qorǵaýshy tarap pen jábirlenýshiniń apellıatsııalyq shaǵymy qanaǵattandyrylmady
ShYMKENT. KAZINFORM - Qalalyq sottyń apellıatsııalyq alqasy burynǵy qala ákiminiń orynbasary Rýslan Berdenovke qastandyq jasaý isi boıynsha sottalǵan Ernar Jıembaıdyń isine qatysty taraptardyń shaǵymdaryn qarady.
Otyrystyń qorytyndysy boıynsha úkim ózgerissiz qaldyryldy.
Qorǵaýshy tarap pen jábirlenýshi tarap úkimge qarsy qarama-qarsy ustanymmen apellıatsııalyq shaǵym túsirgen bolatyn.
Ernar Jıembaıdyń qorǵaýshylary jazany jeńildetýdi surap, 9 jyl bas bostandyǵynan aıyrý jazasyn bas bostandyǵyn shekteý jazasyna aýystyrýdy talap etti.
Advokattardyń aıtýynsha, olardyń qorǵaýyndaǵy azamattyń Rýslan Berdenovti óltirýge nıeti bolmaǵan, tek qorqytqysy kelgen.
Al jábirlenýshi tarap, kerisinshe, jazany qatańdatýdy talap etti. Rýslan Berdenovtiń ókili taǵaıyndalǵan jaza jasalǵan qylmystyń aýyrlyǵyna saı emes ekenin aıtty.
Sot taraptardyń ýájderin tyńdap, olardyń ótinishterin qanaǵattandyrmady jáne birinshi ınstantsııa sotynyń úkimin ózgerissiz qaldyrdy.
Aıta keteıik, budan buryn Shymkentte Berdenov isi boıynsha apellıatsııalyq sot bastalǵanyn jazǵan bolatynbyz.
21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.
Qylmystyq ister jónindegi aýdanaralyq sotta Shymkent qalasy ákiminiń orynbasary Rýslan Berdenovke qastandyq jasaýǵa qatysty rezonanstyq is boıynsha úkim shyǵaryldy.
Sot úkimimen Ernar Jıembaı 9 jylǵa bas bostandyǵynan aıyryldy.