Berdenov isi: Ernar Jıembaı ákimdikke bararda qarýyn tekserip kórdi — kýáger
ShYMKENT. KAZINFORM — Shymkent qalasy ákiminiń orynbasary Rýslan Berdenovke qatysty qylmystyq is boıynsha ótip jatqan sot tyńdalymynda kýáger retinde Ernar Jıembaıdy kólikpen alyp júrgen Arman Moldabekov jaýap berdi.
Kýágerdiń aıtýynsha, Baǵlan Momynovpen kezdesýden keıin Ernar Jıembaı qarýdy tekserip kórgen.
— Maǵan «Kólikti Qaıtpas-2 yqshamaýdanyna aıdańyzshy» dep aıtty. Birshama kóshelerdi aralap shyqqan soń, «Turan jaqqa qaraı júreıik» dedi. Sol kezde men naqty qaıda baratynymyzdy suradym. Ol bolsa «Ótkende balalar qarýdy ańshylyq kezinde sýǵa túsirip alypty, sondyqtan oq atylmaı jatyr. Qazir úlken kisilerge beremin, uıat bolyp qalady» dedi. Keıin Turan yqshamaýdanyndaǵy naqty orny belgisiz jazyq jerge bardyq. Sol jerde avtokóliktiń júk salǵyshynan qarýdy alyp, eki-úsh ret atyp kórdi. Sodan soń kólikke otyryp, Nursát yqshamaýdanyndaǵy Nazarbaev dańǵylynda ornalasqan úıine aparyp tastaýdy surady, — dedi Arman Moldabekov.
Kýágerdiń sózinshe, sodan keıin Ernar Jıembaı monshaǵa barýdy usynǵan. Biraq Nazarbaev dańǵylynda ornalasqan úıdiń jertólesinde Arman Moldabekov óz kóligine otyrǵannan keıin, Jıembaı óziniń kóligimen ketip qalǵan.
Aıta keteıik, budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz.
21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.
Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.