Berdenov isi: Eki tarap ta apellıatsııaǵa shaǵym túsirdi

ShYMKENT. KAZINFORM — Qalalyq sottyń apellıatsııalyq alqasy Shymkent qalasy ákiminiń burynǵy orynbasary Rýslan Berdenov pen 9 jylǵa sottalǵan Ernar Jıembaıǵa qatysty rezonansty is boıynsha berilgen shaǵymdardy qaraıdy.

Sottyń baspasóz qyzmeti «Kazinform» agenttiginiń resmı saýalyna bergen jaýabynda apellıatsııany eki tarap ta túsirgenin rastady.

— Apellıatsııalyq shaǵymdardy qaraý 8 qazan kúni saǵat 12:00–de Shymkent qalalyq sotynyń ǵımaratynda ótedi, — dep habarlady sotta.

Eske sala keteıik, daýly is 20 tamyzda aıaqtalǵan bolatyn. Qylmystyq ister jónindegi mamandandyrylǵan aýdanaralyq sot Ernar Jıembaıdy orta qaýipsizdik mekemesinde 9 jyl bas bostandyǵynan aıyrýǵa úkim shyǵardy. Sonymen qatar ol jábirlenýshige 30 AEK (2025 jyly — 117 960 teńge) kóleminde ótemaqy tóleýge mindetteldi.

Bul iste Rýslan Berdenov jábirlenýshi retinde tanyldy. Oǵan 21 sáýirde Shymkent qalasy ákiminiń orynbasary qyzmetine taǵaıyndalǵanyna eki aı tolǵan kezde qastandyq jasalǵan.

Sheneýnik jaraqat alyp, shuǵyl túrde aýrýhanaǵa jetkizilip, ota jasaldy.

Kúdikti Ernar Jıembaı qylmys ornynda ustalyp, oǵan «Adam óltirýge oqtalý» baby boıynsha aıyp taǵyldy. Іs sotqa 22 shildede joldanyp, 20 tamyzda sýdıa Ábinur Qarabaev úkimin jarııalady.

Ernar Jıembaı sol kezde apellıatsııa berýge nıeti joq ekenin aıtqan, biraq ondaı múmkindikti joqqa shyǵarmaǵan. Al Rýslan Berdenovtiń múddesin qorǵaǵan Jeńis Tynybek jábirlenýshi tarapynan apellıatsııa beriletinin málimdegen edi.

29 tamyzda Rýslan Berdenov óziniń ótinishimen ákim orynbasary qyzmetinen ketti.

Endi bul rezonansty istiń taǵdyryn apellıatsııalyq alqa qaıta qaraıdy.