Benzınniń ár partııasy QR-kod arqyly qadaǵalanbaq
ASTANA. KAZINFORM – Janarmaıdyń ár partııasy QR-kod arqyly qadaǵalanbaq. Bul týraly Quryltaı depýtattarynyń saýalyna Premer-mınıstr Oljas Bektenovtiń jaýabynda aıtylǵan.
Úkimet basshysynyń atap ótýinshe, qazirgi ýaqytta elimizde munaı ónimderin óndirý men olardyń aınalymyn esepke alý júıesi jumys isteıdi. Júıe munaı ónimderi aınalymynyń negizgi kezeńderindegi qozǵalysty baqylaýǵa múmkindik beredi. Esepke alý Energetıka mınıstrligi «Qazaqstan Respýblıkasynyń Otyn-energetıka kesheniniń ahýaldyq taldama ortalyǵy» AQ-nyń biryńǵaı aqparattyq bazasy arqyly júrgiziledi. Onda munaı ónimderin óndirý, jóneltý, ótkizý kólemderi jáne olardyń qaldyqtary týraly málimetter jınaqtalady.
- Munan bólek, munaı ónimderin baqylaý aspaptaryn engizý jumysy aıasynda Qarjy mınıstrliginiń «Aqparattyq-esepke alý ortalyǵy» AQ derekterdi yqpaldastyrý jáne tıisti aqparattyq júıelerdi damytýdy qolǵa alǵan. Bul munaı ónimderiniń qozǵalysyn avtomattandyrylǵan túrde esepke alýǵa jáne naryqqa qatysýshylardyń ártúrli aınalym kezeńderindegi derekterin ózara salystyrýǵa qosymsha múmkindik beredi. Otynnyń árbir jekelegen partııasyn óndirýshiden nemese ımporttaýshydan bastap naqty janarmaı quıý stantsııasyna deıingi qozǵalysyn qadaǵalaýdy qamtamasyz etý, onyń ishinde otynnyń shyǵý tegi men zerthanalyq baqylaý nátıjeleri týraly málimetterge QR-kod berý boıynsha tehnıkalyq jáne normatıvtik máseleler qosymsha pysyqtalyp jatyr, - dedi Oljas Bektenov.
Premer-mınıstrdiń aıtýyna qaraǵanda, ol úshin munaı bazalarynda otyn partııalaryn saqtaý, aralastyrý jáne aýystyryp tıeý kezinde sáıkestendirý tártibin, kórsetilýge tıis málimetterdiń tizbesi men olardyń kózderin, zerthanalyq baqylaý nátıjelerin tirkeý tártibin, naryqqa qatysýshylardyń derekterdiń durystyǵyna jaýapkershiligin, sondaı-aq tıisti aqparatty qoldanystaǵy aqparattyq júıelermen ıntegratsııalaý tetikterin aıqyndaý qajet.
- Atalǵan máselelerdi ýákiletti memlekettik organdar usynylyp otyrǵan sheshimderdi tehnıkalyq turǵydan iske asyrý múmkindigin jáne naryqqa qatysýshylarǵa túsetin artyq ákimshilik ári qarjylyq júktemeni boldyrmaý qajettiligin eskere otyryp pysyqtaıtyn bolady, - dedi Úkimet basshysy.
Buǵan deıin Premer-mınıstr Oljas Bektenov sapasyz benzın saldarynan kólik buzylǵanda shyǵyndy kim óteıtinin aıtqan edi.
