Benzınniń tonnasy 214 584 teńge – mınıstrlik janarmaıdyń kóterme saýdadaǵy shekti qunyn bekitpek

ASTANA. QazAqparat – AI-92 jáne AI-93 markaly benzınniń kóterme saýdadaǵy shekti baǵasy tonnasy úshin 214 584 teńge bolyp bekitilmek. Bul týraly «Ashyq» NQA portalynda jarııalanǵan Energetıka mınıstriniń buıryq-jobasynda jazylǵan, dep habaraıdy QazAqparat tilshisi.

«Munaı ónimderiniń jekelegen túrlerin óndirýdi jáne olardyń aınalymyn memlekettik retteý týraly» QR Zańy 7-babynyń 15-1) tarmaqshasyna sáıkes BUIYRAMYN:

1. Baǵalardy memlekettik retteý belgilengen munaı ónimderin statsıonarlyq avtojanarmaı quıý stantsııalary úshin kóterme saýdada ótkizýdiń shekti baǵalary munaı óńdeý zaýytyn jetkizý negizinde, qosylǵan qun salyǵy esebimen mynadaı mólsherde belgilensin:

1) AI-80 markaly benzın – 1 tonnasy úshin 93 161 teńge;

2) AI-92 jáne AI-93 markaly benzın – 1 tonnasy úshin 214 584 teńge;

3) dızel otyny (jazǵy, maýsymaralyq) – 1 tonnasy úshin 284 350 teńge», - delingen buıryq-jobasynda.

Vedomstvo dereginshe, bul janar-jaǵarmaı naryǵyndaǵy baǵany turaqtandyrý men munaı ónimderiniń tapshylyǵyn boldyrmaý maqsatynda qolǵa alynyp otyr.

«Joba janar-jaǵarmaı quıý stantsııalarynda resýrs ıelerinen munaı ónimderin básekege qabiletti baǵamen satyp alýdy qamtamasyz etý, sondaı-aq janar-jaǵarmaı naryǵyndaǵy baǵany turaqtandyrý jáne eldegi munaı ónimderiniń tapshylyǵyn boldyrmaý maqsatynda ázirlengen», - dep túsindirme berilgen buıryqqa.

Qujat 7 sáýirge deıin kópshilik talqylaýda bolady.

Eske salaıyq, buǵan deıin Qazaqstanda benzın men dızel otynynyń baǵasy ósetinin habarlap edik. Atap aıtqanda, AI-92 jáne AI-93 markaly benzınge baǵa lıtrine 182-187 teńgeden 205 teńgege deıin kóteriledi. Ósim – 11%. Al, dızel otynynyń baǵasy lıtrine 295 teńgege deıin qymbattaıdy. Ortasha eseppen ósim – 20%. Qazir óńirge baılanysty baǵa 230 teńgeden 260 teńgege deıin bolyp tur.