Benzın tolyq quımaǵan janarmaı beketi 3 mln teńge aıyppul arqalady

ASTANA. KAZINFORM — Almatyda benzındi tolyq quımaǵany úshin «Gazpromneft-Qazaqstan» JShS 3 mln teńgege aıyppul salyndy, dep habarlady Tehnıkalyq retteý jáne metrologııa komıteti.

АЗС бензин заправка жанармай бекеті
Фото: Александр Павский/Kazinform

Saýda jáne ıntegratsııa mınıstrligi Tehnıkalyq retteý jáne metrologııa komıtetiniń Almaty qalasy boıynsha departamenti jeke tulǵanyń ótinishi negizinde «Gazpromneft-Qazaqstan operatsııalyq kompanııasy» JShS qatysty jospardan tys tekserý júrgizdi. Tekserý «Ólshem birligin qamtamasyz etý týraly», «Tehnıkalyq retteý týraly» QR Zańynyń jáne metrologııa salasyndaǵy basqa da normatıvtik-quqyqtyq aktilerdiń talaptaryn saqtaýǵa qatysty boldy.

— Saýda operatsııalaryn jasaý kezinde ıelikten shyǵarylatyn taýarlardyń sanyn memlekettik metrologııalyq baqylaý barysynda № 1 JJQ arqyly AI-95-K4 markaly avtomobıl benzınin jiberý kezinde jol beriletin qatelikten asatyn aýytqý anyqtaldy. 20 lıtr benzındi quıý barysynda 100 ml-ge az toltypylǵan. Bul standarttardy buzý bolyp tabylady, — delingen habarlamada.

Janar-jaǵarmaı materıaldaryn (JJM) «Gazpromneft-Qazaqstan operatsııalyq kompanııa» JShS № 132 JJQS-ǵa jiberýdi baqylaý belgilengen tártippen senim bildirilgen jáne 2025 jylǵy 24 sáýirge deıin qoldanysta bolǵan M2r-20 metall etalondyq ólsheýishti paıdalana otyryp júzege asyryldy.

QR Energetıka mınıstriniń m. a. 2019 j 11 naýryzdaǵy № 81 buıryǵy jáne QR Indýstrııa jáne ınfraqurylymdyq damý mınıstriniń 2019 j № 143 buıryǵymen belgilengen memlekettik retteýge jatatyn ólshemder tizbesine sáıkes janarmaı quıý stantsııasyndaǵy munaı ónimderiniń kólemin ólsheýdiń shekti ruqsat etilgen qateligi ±4% quraıdy.

— № 132 janar-jaǵarmaı quıý stantsııasynda janar-jaǵarmaı quıý stantsııalaryn qabyldaý, saqtaý jáne bosatý kezinde ártúrli ólsheý quraldary, sonyń ishinde deńgeı ólshegishter, etalondyq metall ólshegish, metrostoktar jáne TRK qoldanylady. Alaıda, ólsheý quraldarynyń bir birligin — № 1 JJQ -tekserý kezinde aýytqý ruqsat etilgen qatelikterden asyp túsetini anyqtaldy, bul jabdyq qoldanýǵa jaramsyz dep tanyldy. Jospardan tys tekserý nátıjeleri boıynsha «Ólshem birligin qamtamasyz etý týraly» Qazaqstan Respýblıkasy Zańynyń 19-babynyń buzylýy anyqtaldy. «Gazpromneft-Qazaqstan operatsııalyq kompanııasy» JShS zań talaptaryn buzǵany úshin ákimshilik jaýapkershilikke tartylyp, 3 145 600 teńge kóleminde aıyppul salyndy, — dep túıindedi komıtet.

Osyǵan deıin 1 aqpannan bastap Qazaqstanda avtomobıl gazynyń baǵasy óskenin jazǵan edik.

Сейчас читают