Benzın tasymaldaýshy kólik jarylysy: 2 adam qaza taýyp, 70-i jaralandy

RIM. QazAqparat - Italııada Bolonıa qalasynyń shet jaǵyndaǵy jolda bolǵan benzın tasymaldaýshy kóliktiń jarylysy saldarynan kem degende eki adam qaza taýyp, 70-i jaraqattandy, dep habarlaıdy VVS.

RaiNews24 telearnasynyń derekterine qaraǵanda,  14  adamnyń jaǵdaıy tym aýyr.  Al júk kóligi janyp ketken.

Lapyldaǵan ot sol mańǵa jaqyn jerdegi avtosalondy sharpyǵan. Saldarynan 10 mashına órtenip, jarylǵan.

Tótenshe jaǵdaı bolǵan jerge órt sóndirý jáne jedel járdem kóligi bardy, jol ýaqytsha jabyq.

Aıta keter jaıt, jarylys qalalyq áýejaı mańynda bolǵan. Tvıtterde habarlanǵandaı, Bolonıa áýejaıy órtten zardap shekpegen jáne  shtattyq rejimde jumys istep jatyr.