Katonqaraǵaıǵa jetý jeńildeıdi: 12 shaqyrymdyq jańa jol qarashada ashylady
ASTANA. KAZINFORM — Shyǵys Qazaqstanda kólik qatynasyn jeńildetetin jańa jol qarashada iske qosylady. Uzyndyǵy 12 shaqyrymǵa jýyq Osınov asýyn aınalyp ótetin baǵyt qazirgi joldy shamamen 6 shaqyrymǵa qysqartyp, qysta qozǵalysy kúrdelenetin ýchaskedegi qaýipsizdikti arttyrmaq.
Búginde uzyndyǵy 12 shaqyrymǵa jýyqtaıtyn joldyń negizgi bóligi daıyn. Joldy qarasha aıynyń birinshi onkúndiginde paıdalanýǵa berý josparlanyp otyr. Qazirgi ýaqytta kópir qurylysyn aıaqtaý ǵana qaldy.
Búgin Shyǵys Qazaqstan oblysynyń ákimi Nurymbet Saqtaǵanov jańa jolǵa baryp, qurylys barysyn tekserdi.
— Jańa joldaǵy kópirdiń uzyndyǵy 176 metr, al bıiktigi 45 metrdi quraıdy. Joldyń taǵy bir mańyzdy ereksheligi — onyń burynǵy aınalma baǵytpen salystyrǵanda shamamen 6 shaqyrymǵa qysqa bolýy. Bul júrgizýshilerdiń ýaqytyn únemdeýge múmkindik beredi, — dedi Nurymbet Saqtaǵanov.
Osınov asýy — qysta aýa raıynyń qolaısyzdyǵyna baılanysty kólik qozǵalysy kúrdelenetin ýchaskelerdiń biri. Jańa joldyń iske qosylýy osy aýmaqtaǵy qozǵalys qaýipsizdigin arttyryp, kólik qatynasyn jeńildetýge múmkindik beredi.
Sonymen qatar jańa baǵyt Shyǵys Qazaqstannyń týrıstik áleýetin damytý úshin mańyzdy. Jol paıdalanýǵa berilgennen keıin demalýshylar Altaı, Úlken Naryn jáne Katonqaraǵaı aýdandaryndaǵy týrıstik nysandarǵa qaýipsiz ári qysqa baǵytpen jete alady.
Aıta keteıik, jol ınfraqurylymyn jańartý — óńirdiń týrıstik tartymdylyǵyn arttyrýmen qatar, eldi mekender arasyndaǵy baılanysty jaqsartýǵa jáne turǵyndar men qonaqtar úshin qaýipsiz ári qolaıly jaǵdaı qalyptastyrýǵa baǵyttalǵan.
Zaısan, Katonqaraǵaı, Kendirli áýejaılaryna qaı áýe kompanııanyń ushaǵy qatynaıtynyn myna siltemeden oqyńyz.
