Benzın salasyndaǵy qarbalas artta qaldy - Energetıka mınıstrligi

ASTANA. QazAqparat - QR Energetıka vıtse-mınıstri Áset Maǵaýovtyń aıtýynsha, buǵan deıin benzın tapshylyǵy bolǵan. Alaıda qazirgi kezde ondaı problema joq, dep xabarlaıdy QazAqparat tilshisi.

«Shyny kerek, shildeden bastap benzın qory azaıa bastady. Degenmen, ımporttyń arqasynda jaǵdaıdyń jaqsarǵanyn baıqap otyrmyz. Máselen, sońǵy bir aptanyń ishinde AI-92 markaly benzınniń qory 120-128 myń tonnadan 134 myń tonnaǵa ósti. Bul degenimiz, barlyq munaı bazalarynda benzınniń qory 5 paıyzǵa artty», - dedi Maǵaýov búgingi brıfıngte.

Onyń aıtýynsha, Qazaqstandaǵy benzınniń 30 paıyzy syrttan tasymaldanady. Atalǵan otynnyń deni - Reseıdiń munaı ónimderi.

«Maýsymda kórshi memleketten 42 myń tonna ónim ımporttaldy. Shilde men tamyzda - 60 myń tonna, al osy aıdyń on kúninde shamamen 50 myń tonna jetkizildi. Barlyǵy 100 myńdaı tonna ımporttalady. Qazirgi kezde iri janar-jaǵarmaı quıý stansalary qajetti benzınniń kólemin rásimdep aldy. Negizi, benzın salasyndaǵy qarbalasty eńserdik deýge bolady»,  - dep atap kórsetti vıtse-mınıstr.

Aıta keteıik, buǵan deıin Úkimet úıinde ótken baspasóz máslıxatynda QR Energetıka vıtse-mınıstri Maǵzum Myrzaǵalıev benzın tapshylyǵyna qatysty túsinik berdi.