Benzın óndirisinen bastap tutynýshyǵa deıingi búkil protsess tekserilip jatyr – Úkimet basshysy
ASTANA. KAZINFORM – Benzın óndirýden bastap ony túpkilikti tutynýshyǵa deıin ótkizýge qatysty barlyq tehnologııalyq jáne logıstıkalyq protseske aýdıt júrgizip jatyr. Bul týraly Quryltaı depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Qoldanystaǵy zańnamada avtomobıl otynyna qoıylatyn talaptardyń saqtalýyn memlekettik baqylaý tetikteri, onyń ishinde baqylaý maqsatynda satyp alý, úlgilerdi iriktep alý, akkredıttelgen zerthanalarda synaq júrgizý, sondaı-aq jospardan tys tekserýler kózdelgen, - dedi ol.
Úkimet basshysynyń atap ótýinshe, munan bólek, Ákimshilik quqyq buzýshylyq týraly kodekstiń 415-babynyń birinshi bóliginde tehnıkalyq reglamentterdiń talaptaryna sáıkes kelmeıtin ónimdi aınalymǵa shyǵarǵany úshin jaýapkershilik kózdelgen. Al ÁQBtK-niń 281-babynyń besinshi bóligi kondıtsııalyq emes munaı ónimderin ótkizýge jáne olardy keıinnen qaıta óńdeýsiz saqtaýǵa jol bergeni úshin jaýapkershilikti, onyń ishinde munaı ónimderi men odan alynǵan kiristerdi tárkileý múmkindigi qarastyrylǵan.
- Otynnyń belgilengen talaptarǵa sáıkes kelmeıtini anyqtalǵan jaǵdaıda kináli tulǵa memlekettik baqylaý jáne zerthanalyq zertteýler nátıjeleri negizinde aıqyndalady. Jalpy, 2026 jyldyń basynan beri Saýda jáne ıntegratsııa mınıstrliginiń Tehnıkalyq retteý jáne metrologııa komıteti janarmaı quıý stantsııalarynda 76 baqylaý is-sharasyn, onyń ishinde jospardan tys tekserýler, profılaktıkalyq baqylaý jáne baqylaý maqsatynda satyp alýdy júzege asyrdy. Munan bólek, soltústik óńirlerdegi tutynýshylardyń ótinishterin eskere otyryp, Energetıka mınıstrligi, Tehnıkalyq retteý jáne metrologııa komıteti, «QazMunaıGaz» UK» AQ, «KAZENERGY» qaýymdastyǵy, beıindi zerthanalar jáne «Munaı, munaı ónimderi jáne jaǵarmaı materıaldary» standarttaý jónindegi tehnıkalyq komıtettiń ókilderi qatysatyn vedomstvoaralyq komıssııa quryldy. Sondaı-aq munaı ónimderin óndirý men ótkizý tizbeginiń barlyq kezeńi boıynsha kóshpeli tekserýler júrgizilip jatyr, - dedi Oljas Bektenov.
Premer-mınıstrdiń aıtýynsha, vedomstvoaralyq komıssııa benzın óndirýden bastap ony túpkilikti tutynýshyǵa deıin ótkizýge qatysty barlyq tehnologııalyq jáne logıstıkalyq protseske aýdıt júrgizip jatyr. Aýdıt qorytyndysy boıynsha otyn aınalymynyń sapasyn baqylaýdy kúsheıtý jóninde qajetti sharalar ázirlenedi. Sonymen qatar memlekettik baqylaýdy odan ári kúsheıtý jáne munaı ónimderiniń sapasyn qadaǵalaýdy qamtamasyz etý maqsatynda Quryltaı qaraýyna tehnıkalyq retteý jáne ólshem birligin qamtamasyz etý máseleleri qatysty zań jobasy engizilgen.
Qujatta memlekettik baqylaý nysandarynyń biri retinde tergep-tekserý tetigin engizý kózdelgen. Bul anyqtalǵan sáıkessizdikterdiń sebepterin anyqtaýǵa jáne ónimniń jetkizilimin óndirýshige nemese ımporttaýshyǵa deıin qadaǵalaýǵa múmkindik beredi.
Baqylaý tetikterin kúsheıtýmen qatar onyń nátıjeleriniń ashyqtyǵyn qamtamasyz etýge jáne tutynýshylardy aqparattandyrýǵa da erekshe nazar aýdarylady. Atap aıtqanda, júrgizilgen tekserýler, anyqtalǵan buzýshylyqtar jáne qabyldanǵan sharalar týraly aqparatty ýákiletti memlekettik organdar resmı aqparattyq resýrstarda ornalastyrady jáne ol kópshilikke qoljetimdi.
- Qoldanystaǵy aqparattyq resýrstardy damytý aıasynda memlekettik organdar atalǵan málimetterdi odan ári júıeleý, olardy ornalastyrý formatyn jetildirý jáne tutynýshylar úshin aqparattyń qoljetimdiligin arttyrý boıynsha turaqty túrde jumys júrgizedi, - dedi ol.
Buǵan deıin Premer-mınıstr Oljas Bektenov sapasyz benzın saldarynan kólik buzylǵanda shyǵyndy kim óteıtinin aıtqan edi.
Sonymen qatar onyń málimetinshe, aldaǵy ýaqytta janarmaıdyń ár partııasy QR-kod arqyly qadaǵalanýy múmkin.
