Benzın men dızel otynynyń aktsızin esepteý tártibi naqtylandy
ASTANA. KAZINFORM — Úkimettiń 2026 jylǵy 27 tamyzdaǵy qaýlysymen benzınge (avıatsııalyq benzındi qospaǵanda), dızel otynyna, gazoholǵa, benzanolǵa, munaı eritkishine, jeńil kómirsýtekter qospasy men ekologııalyq otynǵa salynatyn aktsız mólsherlemelerine ózgerister engizildi.
Atap aıtqanda, benzın men dızel otyny belgilengen shekti baǵadan qymbat satylǵan kezde aktsızdi esepteý tártibi naqtylandy.
Benzın, gazohol, benzanol, munaı eritkishi, jeńil kómirsýtekter qospasy men ekologııalyq otyn kóterme saýdada satylǵanda, ımporttalǵan kezde jáne alys-beris shıkizatynan óndirilgen ónim berilgende bazalyq mólsherleme tonnasyna 38 134 teńge bolyp qalady.
Eger ónimniń bir tonnasynyń baǵasy 214 584 teńgeden assa, bazalyq mólsherlemege QQS eskerilgen ortasha ólshengen kóterme baǵanyń belgilengen shekti baǵadan asqan bóliginiń 50%-y qosylady.
Óndirýshiler otyndy bólshek saýdada satqanda nemese óz óndiristik qajetine paıdalanǵanda bazalyq mólsherleme tonnasyna 38 634 teńge bolady.
Dızel otynynyń shekti baǵasy tonnasyna 284 350 teńge bolyp belgilengen. Ony kóterme saýdada satqanda, ımporttaǵanda jáne alys-beris shıkizatynan óndirilgen ónimdi bergende bazalyq mólsherleme tonnasyna 35 726 teńge bolady. Al óndirýshiler dızel otynyn bólshek saýdada satqanda nemese óz óndiristik qajetine paıdalanǵanda bazalyq mólsherleme tonnasyna 35 786 teńge bolady.
Osylaısha, jańa tártip bazalyq mólsherlemelerdi kótermeıdi. Ózgeris otyn baǵasy belgilengen shekten asqan kezde aktsızdi esepteý tetigin naqtylaıdy.
Qaýly 2026 jylǵy 31 tamyzdan bastap qoldanysqa engizildi. Onyń kúshi 2026 jylǵy 17 shildeden bastap týyndaǵan quqyqtyq qatynastarǵa qoldanylady.
Aıta keteıik, 31 tamyzdaǵy jaǵdaı boıynsha Astanada AI-92 benzıniniń lıtri 247 teńge, al dızel otyny 335–337 teńge aralyǵynda boldy.
