Benzın men dızeldiń qymbattaýy taýar jáne qyzmet qunyna qalaı áser etedi

ASTANA. QazAqparat – QR Energetıka mınıstriniń mindetin atqarýshy Bolat Aqsholaqov elimizde benzın men dızel otyny baǵasynyń ósýi azyq-túlik qunyna áser etýi máselesine qatysty suraqqa jaýap berdi, dep habarlaıdy QazAqparat tilshisi.

Aıta keteıik, Qazaqstanda benzın men dızel otynynyń baǵasy ósedi. Osy oraıda tıisti buıryqtyń jobasy búgin jarııalanady.

«Janarmaı baǵasynyń ınflıatsııaǵa yqpaly máselesine toqtalsaq, biz baǵany eki ese kóterip jatqan joqpyz. Biz benzındi (AI-92 jáne AI-93) 11 paıyzǵa, dızeldi 20 paıyzǵa kóterip jatyrmyz. Meniń oıymsha, janar-jaǵarmaı baǵasynyń ósýi taýar qunyna qosatyn úlesi shyn máninde asyra kórsetilip otyr. Sebebi 2021 jylǵy jáne 2022 jylǵy statıstıkany qarasaq, janarmaı baǵasy ózgergen joq. Biraq osy ýaqyt aralyǵynda taýar baǵasyna basqa faktorlar áser etti», - dedi B. Aqsholaqov Ortalyq kommýnıkatsııalar qyzmetindegi baspasóz máslıhatynda.

Onyń paıymynsha, taýar baǵasyna qatysty eleýli ósim bolmaıdy.

«Atap aıtqanda, bul baǵytta tıisti qadaǵalaý kerek. Árıne, qandaı da bir ósim bolady. Biraq munyń bári josparlanǵan ınflıatsııa sheginde bolady dep oılaımyn», - dedi mınıstrdiń mindetin atqarýshy.

Mınıstrdiń sózine qaraǵanda, taksı qyzmeti qymbattaýy múmkin.

«Biraq benzın 11 paıyzǵa qymbattasa, taksıler de qyzmet qunyn 11 paıyzǵa kóterý kerek degendi bildirmeıdi», - dedi Bolat Aqsholaqov.