Benzın men dızel baǵasy qalaı qalyptasady - mınıstrlik jaýaby
ASTANA. KAZINFORM – Energetıka mınıstrliginiń mamandary elimizde janar-jaǵarmaı baǵasy qalaı qalyptasatynyn túsindirdi.
Vedomstvo Qazaqstannyń janarmaı naryǵyndaǵy benzın men dızel qunyn baǵanyń «tabys teńsizdigi» (dıspartıtet) retinde baǵalap otyr. Mınıstrliktiń benzın men dızel baǵasynyń qalyptasýy týraly anyqtamasynda mundaı teńsizdik 2024 jyly «sur eksporttyń» kólemin arttyrǵany aıtylǵan.
— Janar-jaǵarmaıdyń zańsyz syrtqa shyǵarylýyna qarsy qabyldanyp jatqan sharalarǵa qaramastan, benzın men dızel otynynyń qory 1,007 mln tonnadan 646 myń tonnaǵa deıin, aı saıyn 10 myńnan 50 myń tonnaǵa deıin azaıyp ketken. Onyń ishinde benzın qory 453 myń tonnadan 382 myń tonnaǵa deıin (-16%), dızel qory 554 myń tonnadan 264 myń tonnaǵa deıin (52%) azaıdy, — delingen anyqtamada.
2025 jyldyń qańtarynan bastap janar-jaǵarmaıdyń bólshek jáne kóterme baǵasyna qoıylyp júrgen shekti alyp tastaý týraly sheshim qabyldandy.
- Janar-jaǵarmaı materıaldaryna odan ári baǵa belgileý halyqtyń áleýmettik osal toptaryna basymdyqpen qoldaý kórsete otyryp, naryqtyq jaǵdaıǵa jáne kórshiles elderdegi ortasha baǵalarǵa baılanysty teńgerilgen tetik boıynsha qalyptastyrylatyn bolady, - deıdi mınıstrlikten.
Bul rette baǵany yryqtandyrý munaı óndirýdi damytý jáne munaı óńdeý zaýyttaryn jylyna 18-den 28 mıllıon tonnaǵa deıin keńeıtý jobalaryn iske asyrýǵa múmkindik beredi, ıaǵnı jańa jumys oryndaryn ashýǵa jaǵdaı jasalady.
Buǵan deıin elimizde benzın men dızel baǵasyn memleket rettemeýi múmkin ekeni týraly málimet shyqqan edi.