Benzın baǵasynyń shamadan tys ósýine jol bergen mekemege shara qoldanyldy - BQO
ORAL. QazAqparat - Benzın baǵasynyń shamadan tys ósýine jol bergen «Moskvıchı» (Bókeı ordasy aýdanyndaǵy osy mekemeniń janarmaı quıý beketinde AI-92 markaly benzın baǵasy lıtrine 200 teńgege jetken) beketterine qatysty arnaıy habarlama jiberildi. Bul týraly QR Ulttyq ekonomıka mınıstrligi Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıteti BQO boıynsha departamentiniń basshysy Marat Ospanov málim etti, dep habarlaıdy «QazAqparat» tilshisi.
Onyń aıtýynsha, habarlama qolǵa tıgennen keıin 10 jumys kúni ishinde janarmaı quıý mekemesiniń basshylyǵy kemshilikterdi joıýy tıis. Kemshilik joıylmasa, zań aıasynda sharalar qoldanylady.
2015 jyly halyq tarapynan úlken suranysqa ıe AI-92 markaly benzınge memlekettik retteý joıylyp, baǵa bosatylǵan bolatyn. Sol ýaqyttan bastap onyń quny naryqtaǵy usynys pen suranysqa saı belgilenip otyr. Alaıda bul baǵanyń shamadan tys ósýine jol beriledi degen sóz emes.
Kúni búgin oblysta janarmaı baǵasynyń (AI-92, 95 markaly benzın) belgili bir deńgeıde joǵarylaýyna qatysty taldaý, tekserý jumystary júrgizilýde. Negizgi nazar janarmaıdy kóterme baǵamen ákeletin tasymaldaýshylardyń ózara sóz baılasýyna jol bermeýge aýdarylýda.
Aıta keteıik, monopolııaǵa qarsy zańdylyqty buzǵan sýbektilerge salynǵan barlyq ákimshilik aıyppuldardyń mólsheri - 380 mln. teńge. Dál qazirgi tańda 6 sýbektige qatysty tekserý bastaldy.
