Benzın baǵasynyń kóterilýine alǵysharttardy baıqap otyrǵanymyz joq -Energetıka vıtse-mınıstri Á. Maǵaýov

ASTANA.QazAqparat - Aldaǵy aılarda Qazaqstanda benzın baǵasynyń kóterilýine áser etetin sebepter baıqalyp otyrǵan joq. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Energetıka vıtse-mınıstri Áset Maǵaýov málim etti.

«Bizdiń naryqqa 30-35 paıyz (janar-jaǵarmaı) kóleminde Reseıden jetkiziledi. Sáıkesinshe, Qazaqstanda janar-jaǵarmaı baǵasynyń deńgeıi Reseıdegi janarmaıǵa kóterme baǵanyń deńgeıimen anyqtalady. Jalpy, jaqyn aılarda qandaı da bir baǵanyń kóterilýine alǵysharttardy baıqap otyrǵanymyz joq»,-dedi vıtse-mınıstr.

Osy oraıda ol jazdyń bastalýyna baılanysty Reseıde benzınge baǵanyń maýsymdyq kóterilýi oryn alatyn kezder bolatynyn, alaıda aıtarlyqtaı eleýli ózgerister bolmaıtynyn sóz etti.

Budan bólek ol Qazaqstandaǵy otynnyń qoryna toqtala kele: «Dál qazir qolymda naqty aqparat joq, biraq ta eki apta buryn Úkimetke tıisti esepti tapsyrǵan bolatynbyz. Onda bizde eki-úsh aılyq munaı ónimderiniń qory bar ekeni habarlanǵan edi»,-dedi.