Benzın baǵasy negizsiz kóterilse, monopolııaǵa qarsy den qoıý sharalary qolǵa alynady - QR UEM

ASTANA. QazAqparat - QR Ulttyq ekonomıka mınıstrligi benzın baǵasynyń kóterilýine baılanysty munaı ónimderin ótkizýshi naryq sýbektilerine jáne tutynýshylarǵa mundaı baǵa ózgerisi negizsiz bolǵan jaǵdaıda monopolııaǵa qarsy den qoıý sharalaryn qolǵa alady, dep habarlaıdy QazAqparat.

«Sondaı-aq, búgingi kúni «Munaı ónimderiniń jekelegen túrlerin óndirýdi jáne olardyń aınalymyn memlekettik retteý týraly» Qazaqstan Respýblıkasynyń Zańyna sáıkes baǵalardy memlekettik retteý Aı-80 benzınin bólshek saýdada ótkizýge qoldanylatynyn eskertemiz. Bul rette, buryn retteý qoldanylǵan Aı-92 benzıni (memlekettik retteý 2015 jylǵy qyrkúıekten bastap alyp tastaldy) men dızel otynyna (memlekettik retteý 2016 jylǵy tamyzdan bastap alyp tastaldy) baǵalardy bólshek saýdada ótkizýshiler óz betinshe belgileıdi», - delingen atalǵan mınıstrlik taratqan aqparatta.

Osy rette mınıstrlik Qazaqstan Respýblıkasy munaı ónimderiniń ishki naryǵy (QR Energetıka mınıstrliginiń derekteri boıynsha) Reseı Federatsııasynan ákelinetin ımportqa táýeldi ekenin atap ótken. Osyǵan baılanysty ımporttalatyn munaı ónimderin satyp alý baǵalary bólshek saýda baǵalaryn qalyptastyrýǵa yqpal etedi.

«Qazirgi kezde monopolııaǵa qarsy organ naryq sýbektileri qyzmetiniń básekelestikti qorǵaý salasyndaǵy zańnamaǵa sáıkes kelýi turǵysynan munaı ónimderin ótkizý naryǵyndaǵy ahýalǵa apta saıyn monıtorıng júrgizedi.  Monopolııaǵa qarsy den qoıý sharalary munaı ónimderi baǵalarynyń ósýine sebep bolǵan básekelestikke qarsy kelisilgen is-qımyldar jáne naryq sýbektileriniń kelisimderi, ústem jaǵdaıdy teris paıdalaný faktileri boıynsha qoldanylady. Naryq sýbektilerinen aqparat alý nátıjeleri boıynsha básekelestikti qorǵaý salasyndaǵy zańnamanyń buzýshylyq belgileri anyqtalǵan jaǵdaıda monopolııaǵa qarsy organ tergep-tekserý júrgizýge bastama jasaýǵa quqyly», - dep atap ótedi Ulttyq ekonomıka mınıstrligi.