Benzın baǵasy qymbattamaıdy – mınıstr

ASTANA. QazAqparat – QR Energetıka mınıstri Bolat Aqsholaqov Qazaqstanda benzın men dızel otynynyń qory jasalǵanyn aıtty, dep habarlaıdy QazAqparat tilshisi.

«Benzın men dızel otyny qoryn egis maýsymyna deıin qalyptastyrdyq jáne ımporttaý qajet bolatyn kólemdi qosymsha anyqtadyq. Bıyl bul kólem Reseı Federatsııasymen ekijaqty qarym-qatynas aıasynda shamamen 850 myń tonna dep bekitildi», - dedi Bolat Aqsholaqov Úkimet otyrysynan keıin jýrnalıster suraǵyna bergen jaýabynda.

Sondaı-aq, Energetıka mınıstri benzın baǵasy kóterile me degen suraqqa jaýap berdi.

«Benzın baǵasynyń ósimi kútilip otyrǵan joq», - dep jaýap berdi B. Aqsholaqov.

Buǵan deıin mınıstr Qazaqstannyń sáýir aıynda Germanııaǵa taǵy 20 myń tonna munaı jóneltetinin aıtqan edi.