Benzın baǵasy qashan turaqtanatyny belgili boldy
ASTANA. QazAqparat - Qazan aıynyń sońyna qaraı ishki naryqtaǵy benzın baǵasy turaqtana bastaıdy. Bul týraly Úkimettiń selektorlyq rejımdegi otyrysynda QR Energetıka mınıstri Qanat Bozymbaev málim etti, dep habarlaıdy QazAqparat.
Bozymbaevtyń aıtýyna qaraǵanda, ishki naryqtaǵy AI-92 benzıni men dızel otynyna qatysty ahýalǵa Pavlodar munaı-hımııa zaýytynyń 26 qazanǵa deıin aǵymdyq jóndeý jumystaryna toqtatylýy sebep bolýda. Bastapqyda bul zaýyttaǵy jóndeý jumystary shilde aıynda bastalýy kerek bolatyn. Alaıda sol kezde zaýyt jóndeý jmuystaryna daıyn bolmaı, merzimin ózgertýge týra kelgen.
«Shymkent munaı óńdeý zaýytynda qolǵa alynǵan sharalardyń arqasynda biz qazanda 280 myń tonnanyń ornyna 490 myń tonna munaı óńdep, jospardan tys 40 myń tonna benzınmen jáne 5 myń tonna dızel otynymen qamtamasyz ettik», - dedi mınıstr.
Onyń dereginshe, qazan aıyndaǵy respýblıka boıynsha AI-92 benzıniniń ortasha tutyný kólemi 290 myń tonna bolmaq. Onyń 170 myń tonnasy elimizde óndirilse, 120 myń tonnasy ımporttalady.
«Barlyq MÓZ-derdiń tolyqqandy jumys isteýi esebinen AI-92 benzıni boıynsha ımport úlesin qarashada 30, al jeltoqsanda 20 paıyzǵa tómendetýdi josparlaýdamyz. Qarasha men jeltoqsanda ahýal turaqty bolady dep esepteımiz. Al qazan aıynyń sońynda óz arnasyna túsedi. Al janarmaı quıý beketterinde dızel otyny qańtardan beri 13 paıyzǵa ósti. Shekarada da kóterme baǵasy 6 paıyzǵa qymbattady», - dedi mınıstr.
Qanat Bozymbaevtyń atap ótýinshe, munaı óńdeý zaýyttarynyń qýaty jańǵyrtylǵannan keıin AI-92 benzınin óndirý 2,2 esege, AI-95 pen 98 benzınderi 9 jáne 6 esege, dızel otyny 30 paıyzǵa, avıaotyn 3 esege artatyn bolady.
«Alǵashqy nátıjelerin osy jyldyń jeltoqsany men kelesi jyldyń qańtar aıynda kútemiz», - dedi ol
