Benzın baǵasynyń kúrt ósýine jol berilmeıdi - Energetıka mınıstrligi

ASTANA. KAZINFORM – Memlekettik retteýdi alyp tastaǵannan keıin, AI-92 benzıniniń baǵasy birtindep ósip keledi. Bul rette Energetıka mınıstrligi baǵanyń kúrt ósýine jol berilmeıtinin aıtyp otyr.

- QR Energetıka mınıstriniń 2025 jylǵy 27 qańtardaǵy buıryǵymen vedomstvonyń 2023 jylǵy 12 sáýirdegi № 139 «Baǵalaryna memlekettik retteý belgilengen statsıonarlyq avtojanarmaı quıý stantsııalary úshin kóterme saýdada ótkiziletin munaı ónimderine shekti baǵalardy belgileý týraly» buıryǵynyń kúshi joıyldy. 2025 jylǵy 28 qańtarda Energetıka mınıstriniń JJM-niń shekti kóterme jáne bólshek baǵalaryn joıý jónindegi buıryǵy Ádilet mınıstrliginiń № 35683 memlekettik tirkeýinen ótip, 30 qańtarda kúshine endi. Qańtar aıynda JJM baǵasyna memlekettik retteý alynyp tastalǵanǵa deıin, avtobenzın janar-jaǵarmaı quıý stantsııalaryndaǵy AI-92-niń baǵasy lıtrine 205 teńge jáne dızel otyny 295 teńge bolǵan edi. Al qazirgi ýaqytta bólshek saýdadaǵy avtobenzınniń baǵasy AI-92 markasyna – 204-221 teńgeni qurady, - delingen mınıstrliktiń Kazinform agenttigine bergen jaýabynda.

Vedomstvonyń habarlaýynsha, Úkimet pen ýákiletti organdar baǵanyń kúrt ósýine jol bermeıdi, al janarmaıdy jetkizý salasynda zańsyz áreketterge qatysty barynsha qatań sharalar qabyldanady.

- Mınıstrlik múddeli memlekettik organdarmen turaqty ózara is-qımylda jumys atqaryp, aqparat almasyp otyr. Sondaı-aq, janarmaı baǵasynyń negizsiz kóterilýine jol bermeý boıynsha barlyq 20 óńirdiń ákimdikteri janyndaǵy JJM boıynsha óńirlik shtabtar jandandyryldy, - dep atalyp ótken Energetıka mınıstrligi aqparatynda.

Eske salsaq, jyl basynda benzın baǵasyn naryq retteıtinin jazǵan edik.

Jaqynda Premer-mınıstrdiń birinshi orynbasary Roman Sklıar Úkimet úıindegi baspasóz máslıhatynda Qazaqstandaǵy janarmaı baǵasy kórshi elderdegi baǵamen teńestirletinin aıtty.