Benzın baǵasynyń qymbattaýyna alǵyshart joq – Energetıka mınıstri

Elimizde benzın baǵasynyń kóterilýine alǵyshart joq. Bul týraly Energetıka mınıstri Almasadam Sátqalıev aıtty, dep habarlaıdy QazAqparat tilshisi.

«Reseıde baǵa ósýi múmkin ekendigin qospaıtyn bolsaq, benzınniń qymbattaýyna alǵyshart joq. Qazirgi ýaqytta Qazaqstanda suranys pen tutyný kólemi teńgerimdi. Munaı ónimderiniń qajetti qory jasaqtalǵan. Shamamen 1 aıǵa jetetin dızel otyny, 25 kúnge jetkilikti AI-92 jáne AI-95 benzıni bar. Buǵan qosa, munaı ónimderiniń atalǵan túrleriniń óndirisin qossaq, onda tapshylyq bolmaıdy», - dedi mınıstr XV KazEnergy Eýrazııalyq forýmy aıasynda BAQ ókilderiniń saýalyna oraı.

Degenmen, onyń aıtýynsha, qazirgi ýaqytta Reseıde munaı ónimderi shyǵynyn óteý úshin kólemniń tómendeýine baılanysty syn-tegeýirin bar.

«Importtyq otynnyń qymbattaý múmkindigine baılanysty táýekel bar. Ol ishki naryqtaǵy baǵaǵa proportsıonaldy yqpal etedi. Biz ázirshe qalyptastyrylǵan qordy eskere otyryp, Qazaqstan Respýblıkasynda óndirilgen ónimge arqa súıeımiz», - dedi Almasadam Sátqalıev.