Benzın baǵasyna qatysty eleýli ózgeris bolýy múmkin be

ASTANA. KAZINFORM — Eldiń ishki naryǵynda benzın tapshylyǵy joq. Bul týraly Energetıka vıtse-mınıstri Sanjar Jarkeshov málim etti. 

Búgin Senatta tilshiler moratorıı aıaqtalǵannan beri bir aptanyń ishinde elde janarmaı quny qanshalyqty óskenin surady.

— Janar-jaǵarmaı salasynda baǵa naryqtyq jolmen qalyptasatyny belgili, ıaǵnı qazir biz ony rettemeımiz. Baǵa ózgerip jatqan joq. Birinshi kezekte, baǵa suranys pen usynys jaǵdaıyna qaraı qurylady. Qazirgi kezde elde janarmaı tapshylyǵy joq. Elde 600 myń tonnaǵa jýyq benzın men 600 myń tonna dızel otyny bar, — dedi Sanjar Jarkeshov.

Bul rette ol janarmaı qory jetkilikti ekenin atap ótti. Sondyqtan ishki naryqta tapshylyq bolmaǵandyqtan, otyn baǵasyn ósirýge negiz joq.

— Jalpy, ýákiletti organdar bul naryqtaǵy jaǵdaıdy únemi baqylap keledi. Osy oraıda benzın men dızel otynyna baǵanyń negizsiz ári kúrt ósýine jol berilmeıdi, — dedi vıtse-mınıstr.

Esterińizge sala ketsek, ótken jyldyń 16 qazanynan bastap ınflıatsııa deńgeıi turaqtanǵanǵa deıin AI-92 markaly benzın men dızel otyny baǵasyn odan ári kóterýge moratorıı engizilgen edi. Sol kezden bastap Energetıka mınıstrligi Básekelestikti qorǵaý jáne damytý agenttigimen jáne óńir ákimdikterimen birlesip, tıisti qadaǵalaý júrgizdi. Sondaı-aq ishki naryqty janar-jaǵarmaımen úzdiksiz qamtamasyz etý úshin qajetti sharalar qabyldady. 

Moratorıı osy jyldyń 1 sáýirinde aıaqtaldy.