Benzın baǵasyn naryq retteıdi – Energetıka mınıstri

ASTANA. KAZINFORM – Benzın baǵasy birneshe faktorlarǵa baılanysty. Baǵaǵa qatysty tolyǵyraq Energetıka mınıstri Almasadam Sátqalıev aıtyp berdi.

- Memlekettik retteýdi alyp tastaýdyń máni osynda, baǵa shegin suranys pen usynysqa qaraı naryq retteıdi. Baǵaǵa kóptegen faktor áser etedi, onyń ishinde munaı-gaz ınfraqurylymynyń barlyq tizbegi boıynsha, ıaǵnı munaı óndirýden bastap qaıta óńdeýge deıingi kezeń. Sonymen qatar ınvestıtsııany júzege asyrý, sondaı-aq munaı ónimderin satýmen aınalysatyn jelilerdiń shyǵyny esepke alynady. Tájirıbege súıensek, eger bul naryqty retteýshi yqpalsyz tolyqtaı erkindikke jiberetin bolsaq, onda baǵa kórshiles elderdegi deńgeıge deıin teńestirilýi tıis. Soltústik óńirlerde Reseımen, al ońtústik aımaqtarda Ortalyq Azııa elderiniń baǵasyna jaqyndaıdy, - dedi Almasadam Sátqalıev vedomstvonyń keńeıtilgen alqa otyrysynan keıin ótken baspasóz máslıhatynda. 

Mınıstrdiń aıtýynsha, bılik belgili bir baǵany bekitýdi josparlap otyrǵan joq, biraq Energetıka mınıstrligi áleýmettik jaǵdaıdy baqylaýda ustaıdy. 

- Baǵa áleýmettik turǵydan jaýapty bolýy kerek jáne munaı ónimderi naryǵyn turaqsyzdandyrmaýy tıis. Sondyqtan bul baǵa júıeli túrde, josparly túrde Básekelestikti qorǵaý jáne damytý agenttiginiń baqylaýymen birtindep ósedi. Eger naryq qaǵıdattary týraly aıtatyn bolsaq, belgili bir kezeńde baǵa, Reseı deńgeıine deıin teńesýi yqtımal, - deıdi vedomstvo basshysy. 

Jyl basynda elimizde benzın men dızel baǵasyn memleket rettemeýi múmkin ekeni týraly jazǵan bolatynbyz. 

Energetıka mınıstrligi elimizde benzın men dızel quny álemdegi eń tómen baǵalardyń biri bolyp qala beredi dep sendirip otyr. Biraq bul jaǵdaı kórshi eldermen salystyrǵanda aıtarlyqtaı baǵa alshaqtyǵyna ákeledi.