Benzın baǵasy birtindep kóterilýi múmkin – Erlan Aqparov
ASTANA. KAZINFORM – Benzın baǵasy birtindep kóterilýi múmkin. Bul týraly Energetıka vıtse-mınıstri Erlan Aqparov aıtty.
– Jalpy, ótken jyldardaǵy tájirıbe kórsetkendeı, baǵanyń kúrt ósýi bolmaıdy. Birtindep-birtindep kóteriletin shyǵar. Qansha paıyzǵa kóteriletinin naqty aıta almaımyn, - dedi vıtse-mınıstr elordada ótip jatqan GECA 2026 halyqarlyq geologııalyq forýmy aıasynda agenttik tilshisiniń saýalyna oraı.
Esterińizge sala ketsek, ótken jyldyń 16 qazanynan bastap ınflıatsııa deńgeıi turaqtanǵanǵa deıin AI-92 markaly benzın men dızel otyny baǵasyn odan ári kóterýge moratorıı engizilgen edi. Sol kezden bastap Energetıka mınıstrligi Básekelestikti qorǵaý jáne damytý agenttigimen jáne óńir ákimdikterimen birlesip, tıisti qadaǵalaý júrgizdi. Sondaı-aq ishki naryqty janar-jaǵarmaımen úzdiksiz qamtamasyz etý úshin qajetti sharalar qabyldady.
Moratorıı osy jyldyń 1 sáýirinde aıaqtaldy.