Benzın arzandap keledi: Qazaqstandaǵy munaı zaýyttary naryqty túgel qamtyp otyr
ALMATY. QazAqparat - Qazaqstanda benzın óndirisi bir jylda 9% ósti, dep habarlaıdy QazAqparat tilshisi Energyprom.kz-ke silteme jasap.
«Qazaqstanda bıyl alǵashqy tórt aıda 1,2 mln tonna benzın óndirildi. Bul byltyrdyń osy kezeńimen salystyrǵanda 9% artyq. Dızel otynyn óndirý kólemi 10,3% ósip, 1,6 mln tonnaǵa jetti», - delingen habarlamada.
2019 jyldyń qańtar-naýryz aılarynda Qazaqstandaǵy munaı óńdeý zaýyttary eldegi benzınge degen suranystyń 98,2%-yn, dızel otynyna degen suranystyń 93,1%-yn qamtamasyz etip otyr.
Jyldyq benzın ımporty 94% qysqaryp, 16,7 myń tonnany qurady. Al eksport bir jylda 11,2 ese artqanmen, onyń kólemi ázirge 665,9 tonna ǵana. Energetıka vıtse-mınıstri Mahambet Dosmuhambetov shilde aıynda Qyrǵyzstanǵa Qazaqstan benzıniniń alǵashqy tonnasy jetkizilmek.
Bıyl mamyr aıynda elimizde eń suranys joǵary AI-92 benzıniniń jyldyq baǵasy 6,9% - 1 lıtrine 147,6 teńgege deıin arzandady. AI-95/96 benzıniniń baǵasy 3,8% - 1 lıtrine 168,6 teńgege deıin; AI-98 benzıniniń baǵasy - 3,4% - 1 lıtrine 185,9 teńgege deıin tómendegen.
«Qazaqstanda qazirgi tańda AI-92 jáne AI-95 benzınderiniń profıtsıti baıqalyp otyr. Bul munaıshylar úshin jaǵymdy jańalyq bolmasa da, halyq úshin jaqsy», - deıdi energetıka mınıstri Qanat Bozymbaev.
Energyprom.kz-tiń habarlaýynsha, Batys Qazaqstan oblysynda, Terekti aýdanynyń Alǵabas kentiniń janynda Qazaqstandaǵy tórtinshi MÓZ salý josparlanyp otyr. Joba quny - 420 mln AQSh dollar. Jańa MÓZ shıkizatty Qarashyǵanaq ken ornynan alady. Investorlar jańa zaýytty eki jylda salyp, 2020 jyldyń aıaǵyna deıin iske qospaq.
