Benzın arzan kezde kóligiń bolǵan tıimdi – ekonomıst keńesi
ASTANA. KAZINFORM – Sheteldik taksı qyzmetin usynatyn kompanııalar tabysynyń 90-95%-y Qazaqstanda qalady. Bul týraly Jibek Joly arnasynyń «Búgin LIVE» baǵdarlamasyna qonaq bolǵan ekonomıst Saparbaı Jubaev aıtty.
Taksı qyzmetin jıi paıdalanatynyn tilge tıek etken maman elimizdegi jolaýshy tasymaldaý servısin kórsetetin kompanııalardyń jumysyna baǵasyn berdi.
– Halyqaralyq ıAndeks Taksı, inDrive kompanııalary sheteldik bolǵanymen, Qazaqstanda zańdy túrde tirkelgen. Olar – bizdiń zańdy tulǵalarymyz. Sondyqtan salyq tóleıdi. Sonymen qatar tapqan paıdasynyń 50%-yn nemese odan az mólsherin tehnıkalyq qyzmetterine jumsaıdy da, qalǵanyn devıdent retinde jiberedi. Biraq ol somma bizge tóleıtin qarajattyń kóp bolsa 5-10%-yn ǵana quraıdy. Muny keı otandastarymyz túsinbeı, aqshamyz shetelge shashylyp jatyr dep oılaıdy. Joq, aqshanyń 90-95%-y Qazaqstanda qalady, - deıdi Saparbaı Jubaev.
Óz kezeginde ekonomıst elimizdegi taksı baǵasyna kóńili tolmaıtynyn jetkizdi.
– Baǵaǵa kóńilimiz tolmaıtyn jaǵdaılar óte kóp. Biraq ol – suranys pen usynystyń fýnktsııasy. Suranys kóbeıgen saıyn baǵa da óse beredi. Turǵyndar taksı izdegen kezde kólik bos bolmasa, baǵa kóteriledi. Kerisinshe kólikter bos bolyp, olar jolaýshy izdese, baǵa tómendeıdi. Sondyqtan, baǵa turǵysynan halyqtyń kóńilinen shyǵý úshin mundaı kompanııalardy kóbeıte berýimiz kerek, - deıdi ol.
Saparbaı Jubaev taksı qyzmetin kóp qoldanatyn qazaqstandyqtarǵa keńes aıtty.
– Qazaqstanda benzın baǵasy óte arzan. Osyndaı ýaqytta únemdi kólik alsań, aqshańdy tıimdi jumsaısyń. Astana, Almaty, Shymkent qalalarynda kóliktiń kóp bolý sebebi de osynda dep oılaımyn. Eýropalyq damyǵan memleketterge barsańyz, kóshede kóp kólik kórmeısiń. Olar kóbine qoǵamdyq kólikterdi paıdalanady. Sebebi, atalǵan elderde benzın baǵasy óte qymbat. Sondyqtan benzın arzan ýaqytta nesıege alsańyz da kóligińizdiń bolǵany jaqsy. Biraq, men úlken megapolısterde keptelisterdi azaıtý úshin benzın baǵasyn ınflıatsııa deńgeıinde kóterip qoıǵan durys dep esepteımin, - deıdi ekonomıst.
Aıta keteıik, ótken aıda 175 sheteldik taksı júrgizýshisi el aýmaǵynan shyǵaryldy.