Benzın aktsızin kóterý: energetıka vıtse-mınıstri pikir bildirdi

Energetıka vıtse-mınıstri Erlan Aqkenjenov benzın aktsızin kóterý týraly josparǵa qatysty pikir bildirdi, dep habarlaıdy QazAqparat tilshisi.

«Ol týraly biz de estidik. Eń birinshi qujatty elektrondy júıeden kórdik. Biraq, ókinishke qaraı, Ulttyq ekonomıka mınıstrligindegi áriptesterimizben eshqandaı áńgime bolǵan joq.
Jalpy qandaı da bir salyqtar men mindetti tólemderdi bekitý Energetıka mınıstrliginiń quzyryndaǵy sharýa emes. Bul suraqty ekonomıkalyq blokqa qoıǵan durys. Men ár lıtrge 14 teńge aktsız qosylýy múmkin dep estidim. Esepterin kórgen joqpyn, bizge ony tanystyrǵan joq. Qujat jobasy Energetıka mınıstrliginen emes, Ulttyq ekonomıka mınıstrliginen shyqty. Biz ony áli maquldaǵan jopyz da, qaraǵan da joqpyz. 14 teńge degen san aıtylyp júr. Biraq ol nege negizdelgenin aıta almaımmyz», - dedi Erlan Aqkenjenov.
Onyń aıtýynsha, aktsız quny ár lıtrge 14 teńgeden qymbattasa, bul halyqtyń qaltasyna áser etpek.
«Tájirıbege súıensek, kez kelgen baǵanyń ósýi, ol janarmaı baǵasy bolsa da halyqqa tikeleı áser etedi. Ony biz jaqsy túsinip otyrmyz. Aktsız quny týraly esepteýlerdi kórgen kezde qandaı da bir qorytyndy aıta alamyz», - dedi mınıstrdiń orynbasary.
BAQ ókilderi janarmaı aktsıziniń ár lıtrge 14 teńgeden qymbattaýy kóp pe, az ba degen suraq qoıdy.
«Meniń oıymsha aıtarlyqtaı kóp», - dedi Erlan Aqkenjenov.