Benzın aqpannan bastap aı saıyn 5 teńgege qymbattap otyratyny ras pa – mınıstr jaýaby

ASTANA. KAZINFORM – Energetıka mınıstri Almasadam Sátqalıev BAQ ókildermen ótken baspasóz máslıhatynda janarmaı naryǵyndaǵy oıynshylarǵa qatań sıgnal bergenin aıtty.

- Benzın baǵasy aı saıyn 4 teńgege qymbattap otyrady degen aqparat qanshalyqty ras, - dep surady jýrnalıst.

Almasadam Sátqalıev alǵashqy qymbattaý 4-5 teńgeniń dálizinde bolatynyn aıtady.

- Ázirge sondaı bir naqty algorıtm joq. Búgin ashyq aıttym da. Alǵashqy baǵanyń kóterilýi 5 teńgege deıin bolady dep kútip otyrmyz. 4 teńge bolýy da múmkin. Ári qaraı baǵanyń ózgerýine biz óte qatty den qoıamyz. Biz naryqqa aıtarlyqtaı sıgnal berdik. Biz óndirýshilerge de, jetkizýshilerge de monopolııadan tabys tabýǵa jol bermeımiz, - dedi sheneýnik. 

- Sonda aı saıyn 5 teńgege deıin ósedi dep otyrsyz ǵoı, - dep surady jýrnalıst.

Mınıstr ony alǵashqy qymbattaýdan keıingi ahýal kórsetinin atap ótti.

- Baǵanyń alǵashy kóterilýi 5 teńgege deıin dep aıtýǵa bolady. Ári qaraı qalaı bolatynyn men aıta almaımyn, - dedi ol. 

Eske salsaq, úkimettiń keńeıtilgen otyrysynan keıin aqpan aıynan bastap benzın, dızel, suıytylǵan gaz baǵasy ósetini málim bolǵan edi.