Benıamın Netanıahý qazanda ótetin saılaýdan keıin keń koalıtsııa qurmaq
ASTANA. KAZINFORM – Izraıl Premer-mınıstri Benıamın Netanıahý bıyl qazan aıynda ótetin parlament saılaýynan keıin keń aýqymdy ulttyq koalıtsııalyq úkimet qurýdy josparlap otyrǵanyn málimdedi. Bul týraly Sınhýa agenttigi habarlady.
Qazirgi ýaqytta Netanıahý ásireońshyl jáne ýltraortodoksaldy partııalardan quralǵan koalıtsııalyq úkimetti basqarady. Izraıl buqaralyq aqparat quraldary jarııalaǵan sońǵy saýalnamalarǵa sáıkes, qazirgi koalıtsııa quramyndaǵy partııalar 120 oryndyq parlamentte 53 mandattan artyq jınaı almaıdy. Bul burynǵy quramda úkimet jasaqtaýǵa jetkiliksiz.
«Keń koalıtsııalyq úkimet arab partııalaryna táýeldi bolatyn solshyl úkimetten áldeqaıda tıimdi», – dedi Benıamın Netanıahý.
Saýalnama nátıjeleri boıynsha negizgi oppozıtsııalyq kúshter úkimetti tek arab partııalarymen birlesip qana qura alady. Alaıda keıbir oppozıtsııalyq partııalar arab partııalary Izraıldi evreı memleketi retinde moıyndamaıtynyn aıtyp, mundaı áriptestikten bas tartyp otyr.
Netanıahý jańa koalıtsııaǵa kez kelgen partııa qosyla alatynyn málimdedi.
«Mundaı koalıtsııaǵa qosylýdyń basty sharty – Palestına memleketin qurýǵa jol bermeý», – dedi Izraıl premer-mınıstri.
Aıta keteıik, buǵan deıin Eýropanyń birqatar eli Izraılge qarsy jańa sanktsııalar ázirlep jatqany habarlandy.
