Bentlı kóligimen shekarany zańsyz kesip ótkender Aqtóbede ustaldy
AQTÓBE. QazAqparat - Shekarany zańsyz kesip ótken reseılik nómirli «Bentlı Kontınental GT» kóliginiń ıesi qolǵa tústi, dep habarlaıdy QazAqparat tilshisi.
Oqıǵa 4 tamyz kúni tirkelgen. UQK 2030 áskerı bólimi Áıteke bı aýdandyq kezekshi bólimine habarlasyp, dalalyqta shekarany kesip ótkender týraly aqparat beredi.
«Áıteke bı aýdanynyń Jambyl beketi mańyndaǵy dalalyq jolda reseılik nómirli »Bentlı Kontınental GT« kóliginiń ıesi shekarany zańsyz kesip ótken. Polıtsııa qyzmetkerleri kólikti »Qarabutaq-Qostanaı« tas jolynda ustady. Olar Áıteke bı aýdanynyń Komsomol aýylynan 35 shaqyrym qashyqtyqta qolǵa tústi. Reseıdiń Orynbor oblysyna kólik ıesin anyqtaý úshin suranys jiberildi. Tergeý júrip jatyr», - dedi oblystyq DP baspasóz qyzmetiniń jetekshisi Erbolat Sarqulov.
