Benksı men Leonardo da Vınchıdiń týyndylary Astanaǵa 350 myń týrıst tartty
ASTANA. KAZINFORM — 2026 jyldyń birinshi toqsanynda Astanaǵa kelgen týrıster sany 12%-ǵa ósip, 352 myńnan asty. Qalaǵa kelýshilerdiń qyzyǵýshylyǵyn arttyrǵan jańa týrıstik nysandardy tanystyrý maqsatynda «Astana Tourism» týrızmdi damytý ortalyǵy BAQ ókilderine arnalǵan baspasóz týryn uıymdastyrdy.
Baspasóz týrynda jýrnalıster elordanyń jańa týrıstik oryndaryn aralady. Olardyń qatarynda Benksıge arnalǵan tsıfrlyq kórme, Leonardo da Vınchıdiń bes ǵasyr burynǵy syzbalary boıynsha jasalǵan ekspozıtsııalar kórmesi jáne sońǵy jyldary ashylǵan birqatar jańa nysan bar.
Benksı: strıt-art pen túpnusqa týyndylar
Búginde elorda turǵyndary men qonaqtary jıi baratyn oryndardyń biri — Lumiere Hall mýltımedııalyq mýzeıi. Munda maýsymnyń eń kóp talqylanǵan kórmeleriniń biri — «Benksı: danyshpan ba, álde vandal ma?» kórmesi ótip jatyr. Bul joba kópshiliktiń qyzyǵýshylyǵyn týǵyzyp, Astananyń tanymal týrıstik oryndarynyń birine aınaldy.
Kórme dástúrli mýzeıden ózgeshe. Munda tsıfrlyq tehnologııalar men túpnusqa jádigerler qatar qoıylǵan. Úlken ekrandarǵa shyǵarylǵan beıneler men arnaıy dybystyq súıemeldeýdiń arqasynda London kóshelerindegi áıgili graffıtıler kórermenniń kóz aldynda jan bitkendeı áser qaldyrady.
Mýzeı ókili Nazerke Orynbasardyń aıtýynsha, kórmege Ispanııadan aǵylshyn sýretshisi Benksıdiń túpnusqa jumystary jetkizilgen.
— Ispanııadan aǵylshyn sýretshisi Benksıdiń túpnusqa jumystary jetkizildi. Olardyń qatarynda banknottary, ashyqhattary, fılmge arnalǵan posteri jáne túpnusqa plastyri bar. Kórmeniń mańyzdy bóligi sýretshiniń 2015 jyly júzege asyrǵan eń batyl jobasy — Dismaland saıabaǵyna arnalǵan. Bul Dısneılendke jasalǵan ótkir satıra edi. Onda ekologııa, mıgranttar jáne soǵys taqyryptary kóterildi. Saıabaq jabylǵannan keıin onyń aǵash konstrýktsııalary bólshektelip, Frantsııanyń Kale qalasyna bosqyndarǵa baspana salýǵa jiberildi. Ekinshi zalda VR-aımaq pen kelýshini sol ortaǵa tolyq engizetin aýqymdy beıneınstallıatsııa jumys isteıdi, — dedi ol.
Qazaqstan temir jolynyń tarıhy tsıfrlyq formatta
Elordadaǵy jańa týrıstik oryndardyń biri — Qazaqstan temir joly tarıhy mýzeıi. Ol kelýshilerge 13 maýsymnan beri qyzmet kórsetip keledi.
Aýmaǵy 3 200 sharshy metrdi quraıtyn mýzeı burynǵydaı jádigerlerdi ǵana kórsetýmen shektelmeıdi. Kelýshilerge yńǵaıly bolýy úshin keńistik tórt ınteraktıvti zalǵa bólingen.
Munda Túrksibtiń salyný tarıhynan bastap alǵashqy qazaq temirjol ınjeneri Muhamedjan Tynyshbaevtyń eńbegi men qazirgi temir jol tehnologııasynyń damýyna deıingi kezeń qamtylǵan.
Mýzeı qorynda 250-den astam biregeı jádiger bar. Olardyń arasynda kóne temirjol shamdary, rels ınfraqurylymyna qatysty iri tehnıkalyq buıymdar, arhıv qujattary men salalyq marapattar saqtalǵan.
Kelýshiler ásirese VL80 júk elektrovozyn, TEP70 jolaýshylar teplovozyn, ChME3 jáne 2TEM10 manevrlik teplovozdaryn qyzyǵa tamashalaıdy. Sonymen qatar jańa býynǵa arnalǵan CR200J jolaýshylar vagony da qoıylǵan. Onda qazirgi poıyzdardyń ishki jabdyqtalýy men jańa tehnıkalyq sheshimderin kórýge bolady.
Mýzeıde AR jáne VR tehnologııalary, mýltımedııalyq ekrandar men túrli sımýlıatorlar keńinen qoldanylady. Ekskýrsııa jetekshisi Karına Sapashevanyń aıtýynsha, mundaı tásil balalardy da, eresekterdi de birdeı qyzyqtyrady.
— Eń kóp adam jınalatyn oryn — ınteraktıvti zal. Balalar da, eresekter de lokomotıv kabınasyna otyryp, poıyzdy ózi basqaryp kórgisi keledi. Sol arqyly mashınıstiń jumysyn sezinedi. Bul kelýshilerge erekshe áser qaldyrady. Bıyl ǵana ashylǵanymyzǵa qaramastan, sheteldik týrıster de jıi kele bastady. Ásirese Reseıden keletin qonaqtardyń sany kóbeıip otyr, — dedi Karına Sapasheva.
Mýzeıdi aralaǵannan keıin kelýshiler mádenı sharalar ótetin tarıhı vagon-meıramhanany kóre alady. Munda «Nurly jol» vokzalyndaǵy poıyzdardyń qozǵalys kestesi kórsetiletin aqparattyq taqtamen jabdyqtalǵan kofehana da bar.
Da Vınchıdiń qolmen ustap kórýge bolatyn syzbalary
Óner men ǵylymǵa qyzyǵatyn qala turǵyndary men qonaqtary úshin mańyzdy mádenı oryndardyń biri — Beıbitshilik jáne kelisim saraıynda ótip jatqan «Leonardo da Vinci: Genius of the Renaissance» halyqaralyq kórmesi.
Kórme ashylǵaly beri ony 50 myńnan astam adam tamashalaǵan. Kelýshiler legi áli de tolastaǵan joq.
Ekspozıtsııada Leonardo da Vınchıdiń ǵylymı ári kórkem murasy jan-jaqty tanystyrylǵan. Munda onyń túpnusqa syzbalary negizinde jasalǵan 40-tan astam ónertabys úlgisi qoıylǵan. Bul eksponattar Astanaǵa Rım men Florentsııa mýzeılerinen ákelingen.
Kórmeniń ereksheligi — kelýshiler eksponattardy alystan qarap qana qoımaı, keıbir mehanızmderdi óz qolymen qozǵaltyp, bes ǵasyr buryn jasalǵan ónertabystardyń qalaı jumys isteıtinin kóre alady.
Aıta keteıik, elordada týrızmge salynatyn ınvestıtsııa kólemi de ósip keledi. Astana qalasynyń Investıtsııalar jáne kásipkerlikti damytý basqarmasy basshysynyń orynbasary Maqsat Janabaevtyń aıtýynsha, ótken jyly bul salaǵa 438,3 mlrd teńge ınvestıtsııa quıylsa, 2026 jyldyń alǵashqy bes aıynda onyń kólemi 250 mlrd teńgege jetken.
