Benınde terrorıstik shabýyl saldarynan 15 áskerı qyzmetker qaza tapty

ASTANA. KAZINFORM — Benınniń soltústik-shyǵys bóliginde bolǵan terrorıstik shabýyl saldarynan 15 áskerı qyzmetker qaza tapty, dep habarlaıdy Anadolý.

Benın armııasynyń málimdeýinshe, qarýly adamdar eldiń Nıgermen shekarasyna jaqyn ornalasqan Karımama qalasynyń mańyndaǵy Kofoný aýdanynda ornalasqan áskerı beketke shabýyl jasaǵan.

Shabýyl saldarynan 15 sarbaz qaza taýyp, taǵy 5 áskerı qyzmetker jaraqat alǵan.

Shabýyldan keıin arnaıy operatsııa júrgizilip, onyń barysynda tórt shabýyldaýshynyń kózi joıylyp, kóptegen mototsıkl joıylǵan.

Ótken jyly eldiń soltústiginde bolǵan terrorıstik shabýyl saldarynan 54 áskerı qyzmetker qaza tapty.

Býrkına-Faso jáne Nıgermen shektesetin Benın 2016 jyldan beri terrorıstik qaýip-qatermen betpe-bet kelip otyr.

«Ál-Kaıda» jáne DAISh uıymdarymen (Qazaqstanda tyıym salynǵan - red.) baılanysty terrorıstik toptar teńizge shyǵý múmkindigin alý úshin Gvıneıa shyǵanaǵyna shyǵatyn elderge qaraı jyljýǵa umtylyp keledi.

Aıta keteıik, buǵan deıin Benınde memlekettik tóńkeris bolǵanyn jazdyq.

Byltyr Aýstralııa polıtsııasy terakt josparlady degen kúdikpen jeti er adamdy ustady.