Benın Qazaqstan úshin Afrıka qurlyǵyna shyǵatyn port bolýǵa nıetti – Olýshegýn Adjadı Bakarı
ASTANA. KAZINFORM – Búgin elordaǵa Benın Respýblıkasynyń Syrtqy ister mınıstri Olýshegýn Adjadı Bakarı resmı saparmen keldi.
Mártebeli meımandy QR Premer-mınıstriniń orynbasary – Syrtqy ister mınıstri Murat Nurtileý qarsy aldy.
- Benın kópjaqty yntymaqtastyqty damytýǵa erekshe mán beredi, sebebi qazirgi zamanǵy álem jaǵdaıynda eldermen kópjaqty baılanys ornatý asa mańyzdy. Sonymen qatar, Benın halyqaralyq quqyqty qurmetteıdi jáne dál osy ortaq qundylyqtardy saqtaý men turaqty negizderge súıene otyryp, elderimiz jańa deńgeıge kóterile alady, - dedi Olýshegýn Adjadı Bakarı ekijaqty kezdesý barysynda.
Sheteldik meımannyń málimdeýinshe, Benın Qazaqstanmen ortaq qundylyqtar negizinde berik ári serpindi qarym-qatynas ornatqysy keledi.
- Shyn máninde, bizdiń ortaq qundylyqtar men ortaq kózqaras Benın men Qazaqstan arasynda berik qarym-qatynas ornatýǵa múmkindik beredi. Ásirese biz jeke kezdesý barysynda talqylaǵan aýyl sharýashylyǵy, tsıfrlandyrý, energetıka jáne kólik salasyndaǵy yntymaqtastyq mańyzdy. Sonymen qatar Benın Qazaqstan úshin Afrıka qurlyǵyna shyǵatyn port, qoljetimdilik núktesi bolýǵa nıetti. Biz ortaq qundylyqtardy bólise otyryp, talqylanǵan maqsattarǵa birge jete alatynymyzǵa senimdimin, - deıdi ol.
Aıta ketsek, Qazaqstan men Benın Respýblıkasy arasyndaǵy dıplomatııalyq qarym-qatynas 2011 jyly 13 qyrkúıekte ornatylǵan.
Osyǵan deıin Qazaqstan men Benın arasynda birqatar memorandýmǵa qol qoıylǵany týraly habarladyq.