Benın bıligi memlekettik tóńkeris jasaý áreketiniń jolyn kesti

ASTANA. KAZINFORM — Benın Respýblıkasynyń Іshki ister mınıstri Alassana Seıdý bılik tarapynan memlekettik tóńkeris jasaý áreketiniń joly kesilgenin málimdedi, dep habarlaıdy BBC.

— Áskerılerdiń shaǵyn toby el men onyń memlekettik ınstıtýttaryn turaqsyzdandyrý maqsatynda búlik shyǵardy. Alaıda bul jaǵdaıda Benınniń qarýly kúshteri men olardyń basshylyǵy ahýaldy baqylaýda ustap, tóńkeris jasaý áreketin toqtatty, — dedi Seıdý tikeleı efırde.

Basylymnyń málimetinshe, buǵan deıin Talonnyń aınalasy da prezıdenttiń qaýipsiz jerde ekenin jáne áskerdiń jaǵdaıdy qaıta baqylaýǵa alyp jatqanyn habarlaǵan.

— Bul tek televıdenıeni ǵana baqylaýda ustap otyrǵan shaǵyn top. Turaqty armııa baqylaýdy qaıta qalpyna keltirip jatyr. Qala men el tolyq qaýipsizdikte, — dep málimdedi onyń keńsesi AFP agenttigine.

Jergilikti buqaralyq aqparat quraldarynyń habarlaýynsha, Benınde búlik jasaý áreketin basqarǵan podpolkovnık Paskal Tıgrı qazir qashyp júr, ony izdeý jumystary júrgizilip jatyr. Birneshe adam ustalǵan, alaıda olardyń naqty sany belgisiz.

Áskerı jáne kúshtik qurylymdardaǵy derekkózder AFP agenttigine tóńkeris jasaý áreketine baılanysty shamamen 10 áskerı qyzmetkerdiń tutqyndalǵanyn habarlady.

Búgin buqaralyq aqparat quraldary áskerı kúshterdiń Benınde bılikti basyp alyp, prezıdent Patrıs Talondy qyzmetinen shettetkeni týraly habar taratqan bolatyn. Memlekettik teleradıokorporatsııanyń tikeleı efıri kezinde áskerıler barlyq memlekettik bılik organdarynyń taratylǵanyn jarııalaǵan.