«Benim Auezov'um» kitaby tanystyryldy

NUR-SULTAN. QazAqparat – Nur-Sultan qalasyndaǵy QR Ulttyq akademııalyq kitaphanasynda zańǵar jazýshy Muhtar Áýezovtiń 125 jyldyǵyna oraı túrik tiline aýdarylǵan akademık Zeınolla Qabdolovtyń «Benim Auezov'um» roman-essesiniń tusaýkeser rásimi ótti. Alqaly jıyndy TÚRKSOI uıymy men Qazaqstan Respýblıkasynyń Mádenıet jáne sport mınıstrligi birlesip uıymdastyrdy, dep habarlaıdy QazAqparat.

Keleli basqosýǵa QR Mádenıet jáne sport mınıstri Dáýren Abaev, Halyqaralyq TÚRKSOI uıymynyń bas hatshysy Sultan Raev, qoǵam qaıratkeri, mádenıettanýshy Murat Áýezov, Zeınolla Qabdollovtyń urpaqtary jáne zııaly qaýym ókilderi men belgili ǵalymdar qatysty.

Ónegeli ómirin qazaq ǵylym-bilimine arnaǵan zańǵar jazýshy Muhtar Áýezov jaıly jazylǵan roman-esse ustaz ben shákirt arasyndaǵy rýhanı baılanysty baıandaıdy. Kitap avtory Muhtar Áýezovtiń ustazdyq eńbegin birneshe qyrynan kórsetken. Bul týyndyny basqalardan oqshaýlap turǵan ereksheligi de – dara tulǵanyń ustazdyǵy men jazýshylyq qasıeti toǵystyryla sýrettelgen.

«Meniń Áýezovimdi» túrik tiline qazaqtyń aıtysker aqyn qyzy Ásem Erejeqyzy aýdarǵan. Ol budan buryn reseılik ǵalym Vıktor Kozodoıdyń «Álıhan Bókeıhan» atty shyǵarmasyn da túrikshege aýdarǵan. Sondaı-aq, Zeınolla Sániktiń áńgimelerin de túrik oqyrmandaryna usyndy. Ankarada shyqqan kitaptyń qurastyrýshysy – Amantaı Shárip, ádebı redaktory – Fazyl Bısenbaev, ǵylymı redaktory – Sáýle Erjanova.

Sharaǵa jınalǵan zııaly qaýym túrik tilindegi týyndyǵa óz baǵasyn berdi.

Foto: instagram.com/nabrk.kz