Bendıden Álem chempıonatynda Qazaqstan quramasy «A» tobynda saıysqa túsedi
ASTANA. 24 qańtar. QazAqparat - 29 qańtar men 5 aqpan aralyǵynda Almatyda bendıden (dopty hokkeı) Álem chempıonaty ótedi.
Álemdik birinshilikte kóptegen elderdiń ulttyq quramalary osy saıysta baqtaryn synaıtyn bolady. Jarys 3 topqa bólinip ótkiziledi. Atap aıtqanda, «A» tobynda (joǵary lıga) - Shvetsııa, Reseı, Fınlıandııa, Qazaqstan, Norvegııa, AQSh komandalary, al «V» tobynda (2 dıvızıon) Gollandııa, Vengrııa, Kanada, Belarýs, Latvııa, Monǵolııa, sondaı-aq «S» tobynda Japonııa, Qyrǵyzstan, Ýkraına, Lıtva, Estonııa komandalary tartysqa túsedi.
«A» tobynyń saıystary «Medeý» muzaıdynynda ótedi. Osy jerde 29 qańtarda chempıonattyń ashylýy jáne 5 aqpanda 1-3 oryndar úshin aqtyq saıystar uıymdastyrylady. Al qalǵan eki toptyń jarystary Almatynyń Ortalyq stadıonynda ótkiziledi.
Aıta keteıik, «A» tobynyń barlyq matchtary «Qazaqstan» men «Habar» telearnalarynda taratylady.
Esterińizge sala keteıik, Qazaqstan quramasy dástúrli túrde «A» tobyndaǵy saıystarǵa qatysyp keledi. Álemdik birinshilikterde elimizdiń komandasy 3-inshi jáne 4-inshi oryndardy ıelenip júr.
