Ben Ladenniń jańa fotosýreti úshin FBR sotqa tartylýy múmkin
ASTANA. Aqpannyń 19-y. QazAqparat - Fotosýreti ben Ladenniń jańartylǵan sýretine negiz bolǵan ıspandyq saıasatker Federaldyq tekserý bıýrosyn (FBR) sotqa bere alady.
AQSh Memlekettik departamentiniń saıtynda, izdeýde júrgen lańkester bóliminde jarııalanǵan «№1 lańkestiń» jańa fotosýretimen óz fotosynyń qatty uqsastyǵy Ispanııa Parlamentiniń múshesi Gaspar Lıamasarestiń ashýyn týǵyzyp otyr.
G.Lıamasarestiń aıtýynsha, zamanaýı kelbette jáne qysqa shashty etip beınelengen ben Ladenniń jańa fotosýretin jasaý úshin FBR depýtat fotosyn paıdalanǵan. Ispan saıasatkeri «AQSh ókimetine qatysty sot amalynyń bastalý yqtımaldyǵyn joqqa shyǵarmaıdy». Ol sondaı-aq «oryn alǵan bul oqıǵanyń amerıkan arnaıy qyzmetteriniń jumystarynyń tómen deńgeıin kórsetetinin» málim etti, dep habarlaıdy CNN agenttigi.
G.Lıamasarestiń aıyptaýlaryna túsindirme bergen FBR ókilderi, «qartaıǵan» ben Ladenniń fotorobotyn jasaý úshin shyn máninde saıasatkerdiń fotosýretin qoldanǵandaryn moıyndap otyr. Olar bul áreketterin málimetter bazasynda «laıyqty materıaldyń» tabylmaǵanymen, sondyqtan da sýretshilerdiń biri Internetten tabylǵan saıasatkerdiń sýretin paıdalanýdy usynǵanyn aıtyp, «aqtalýda».
Esterińizge sala keteıik, osynyń aldynda AQSh Memlekettik departamentiniń saıty jasyna qaraı ózgertilgen jáne saqal-murty alynǵan Ýsama ben Ladenniń jańa fotorobotyn jarııalaǵan bolatyn.
Federaldyq tergeý bıýrosy (FBR) kompıýterlik baǵdarlamanyń kómegimen «№1 lańkestiń» qazirgi fotosýretin jasap shyǵarady. Amerıkandyq arnaıy qyzmetterdiń qaraýynda buǵan deıin ben Ladenniń 1998 jyly jasalǵan eski sýreti bolyp kelgen.
AQSh Memlekettik departamentiniń saıtynda ben Ladennen basqa, izdeýde júrgen barlyq halyqaralyq lańkester týraly aqparattar, olardyń fotosýretteri jáne olardy ustaý úshin jarııalanǵan syıaqy somalary jarııalanǵan.
AQSh ben Ladendi ustaǵan janǵa 25 mıllıon dollar tóleýge daıyn. Biraq ta 2001 jyldan beri onyń qaıda júrgeni belgisiz.
