Ben Ladenniń otbasy Pákistannan Saýd Arabııasyna alastatyldy
ASTANA. 28 sáýir. QazAqparat - Pákistanda qalǵan «nómiri birinshi lańkes» Ýsama ben Ladenniń otbasy juma kúnine qaraǵan túnde Saýd Arabııasyna shyǵaryldy, dep habarlady reseılik «Jańalyqtar» agenttigi.
BAQ-tardyń habarlaýynsha, ótken jyly mamyrda amerıkandyq arnaýly qyzmet sarbazdary óltirgen «Ál-Kaıda» halyqaralyq lańkestik jelisiniń burynǵy basshysynyń otbasy músheleri Saýd Arabııasyna arnaıy reıspen attandyryldy.
Budan buryn jergilikti baspasóz Pákistanda ben Ladenniń 12 týysy - úsh jesiri (ekeýi Saýd Arabııasynan, bireýi - Iemennen), segiz balasy men bir nemeresi qaldy dep jazǵan bolatyn. Alaıda Pákistan ІІM ókili Ýsama ben Ladenniń 14 týysyna elden shyǵarýǵa qujat ázirlengenin málimdedi.
AQSh Nıý-Iork pen Vashıngtondaǵy lańkestik shabýyldardy uıymdastyrýǵa kináli dep aıyptaǵan ben Laden 2011 jylǵy 2 mamyrǵa qaraǵan túnde Pákistannyń shyǵysyndaǵy Abbotabad qalasy mańyndaǵy úıde amerıkandyq arnaýly qyzmet operatsııasy kezinde óltirilgen bolatyn. Vashıngtonnyń habarlaýynsha, ben Ladenniń denesi teńizge tastalǵan. Budan keıin onyń otbasy Pákistanda qalǵan bolatyn.
Bıylǵy jyldyń basynda onyń týystary 45 táýlikke túrmege jabylyp, Pákistan aýmaǵynda zańsyz bolǵany úshin úshin aıyppul salynǵan bolatyn. Alaıda túrmege qamalǵanǵa deıin de qamaýda bolǵan kúnder esepke alynyp, olar úkim shyǵarylǵannan keıin eki aptadan soń bostandyqqa shyqty.
Pákistandyq tálipter eger Ýsama ben Ladenniń jesirleri men balalaryn bostandyqqa shyǵarmasa úkimet ókilderine shabýyl jasaımyz jáne jappaı lańkestik uıymdastyramyz dep bopsalady.
