Ben Laden Pákistanǵa kómekti kúsheıtýge shaqyrdy
ASTANA. Qazannyń 2-si . QazAqparat - Ýsama ben Laden sý tasqynynan zardap shekken pákistandyqtarǵa gýmanıtarlyq kómekti kúsheıtýge shaqyrǵan aýdıomálimdeme jasady. №1 lańkes sondaı-aq klımattyń jahandyq ózgerý problemasyna taǵy bir ret toqtalyp ótti,
dep habarlady juma kúni «Frans Press » agenttigi Islamshyl saıttardy monıtorıngileý ortalyǵyna (SITE Intelligence Group) silteme jasap.
SITE ortalyǵynyń aqparaty boıynsha, «Ál-Kaıedanyń» negizgi medıa-qurylymy sanalatyn «As-Sahab» saıtynda berilgen bul aýdıojazba gýmanıtarlyq kómek alyp jatqan Pákistan turǵyndaryn kórsetken kadrlarmen qosa jarııalanǵan.
«Pákistandaǵy apattyń aýqymdylyǵy sonshalyq, ony sózben jetkizý qıyn. Qazir bizge shuǵyl sharalar, sondaı-aq pákistandaǵy musylman baýyrlarymyzǵa kómek jetkizetin qaıyrymdy jáne júrek jutqan adamdar kerek», dep málim etti ben Laden 11 mınýtqa sozylǵan jáne «Gýmanıtarlyq kómek kórsetýdegi irkilister» dep atalǵan úndeýinde.
Pákistanda mýssondyq nóserdiń saldarynan bolǵan sý tasqyny sońǵy 80 jyldaǵy eń kúshti apat bolyp otyr. BUU aqparaty boıynsha, tabıǵat apatynan jalpy eseppen 20 mıllıondaı adam zardap shekken, olardyń 12 mıllıony shuǵyl gýmanıtarlyq kómekke muqtaj. Eń az degende, 1,6 myń adam qaza bolǵan, myńdaǵan úıler qıraǵan, apattan qatty zardap shekken óńirlerde tutas aýyldardy sý shaıyp áketken.
«Klımattyń jahandyq ózgerýiniń saldarynan qurban bolǵandar tym kóbeıip barady... olardyń sany soǵys qurbandarynan da asyp túsýde», - dep jalǵstyrdy №1 lańkes óziniń sózin.
Qańtar aıynda ben Laden jahandyq jylymyq taqyrybyna toqtalǵan bolatyn. Arabtyń «Ál-Jázıra» telearnasy taratqan sol jolǵy úndeýinde ben Laden, jylymyqqa ónerkásiptik damyǵan elder kináli dep, aıyptaǵan edi.
