Beljaılaýdyń tórinde malshylar merekesi ótti – Almaty oblysy
Qazir aýdan boıynsha 22 myń jylqy, 90 myń iri qara, 402 myń qoı-eshki, 316 túıe, 257 shoshqa, 94 myń qus ósirilýde. Bul – árıne, eń aldymen malshy qaýymynyń eseli eńbeginiń nátıjesi. Sonymen qatar úkimet tarapynan júzege asyrylyp jatqan baǵdarlamalar aıasynda nesıe jolymen mal satyp alyp, ıgiligin kórip jatqan malshylar da az emes. Aýdandaǵy birneshe jeke sharýalyq qojalyq bıyl «Sybaǵa» baǵdarlamasy boıynsha 105 mıllıon teńgege - 191 iri qara, 42 mıllıon teńgege - 1565 usaq mal satyp alýǵa nesıe rásimdedi. Mal sharýashylyǵynyń ónimdiligin jáne onyń sapasyn arttyrýdy sýbsıdııalaý boıynsha 41 sharýa qojalyǵy 37 mıllıon 767 myń teńge aldy.
Jalpy, jyldyń tórt mezgilinde de ýaqytpen eseptespeı eńbek etip, el baılyǵyn eselep arttyrýǵa súbeli úles qosyp júrgen mal sharýashylyǵy eńbekkerleriniń qajyrly qareketi qashan da qurmetteýge laıyq. Osyny eskere otyryp, aýdan ákimdigi arnaıy saltanatty merekelik shara ótkizýdi josparlaǵan bolatyn. Jáne ony tikeleı malshylar shoǵyrlanǵan taý tórinde ótkizý uıǵarylǵan. Osyǵan oraı, jap-jasyl kógal ústine aýdandaǵy 14 aýyldyq okrýg aqshańqan kıiz úıler tikti. Dál ortasyna qyzyldy-jasyldy etip ásem bezendirilgen sahna ornalastyrylyp, kún saıyn tórt túliktiń únin jańǵyrtatyn taýly óńir aspanyn ásem án men tátti kúı kernedi.
Jınalysty aýdan ákimi Temirlan Bektasov ashty. «Mundaı shara ótkizý buryn da dástúrde bolǵan eken. Biraq, áralýan sebeptermen on jyldan beri toqtap qalǵan. Biz mal sharýashylyǵy eńbekkerleriniń taýqymetke toly eńbegin árqashan joǵary baǵalaımyz. Sondyqtan olardyń eńbegin eskerip, ádeıi jaılaýda osyndaı mereke uıymdastyryp berýdi jón kórdik»,- deı kele, ozat malshylarǵa Almaty oblysynyń ákimi Amandyq Batalovtyń, oblystyq aýyl sharýashylyǵy departamentiniń jáne aýdan ákiminiń gramotalary men Alǵys hattaryn, taǵy da basqa syı-sııapattaryn tapsyrdy.
Mereke sońynda aýdan ónerpazdary úlken kontsert kórsetti. Qyz qýý, aýdaryspaq syndy ulttyq sport oıyndarynan jarys ótti.
