BELTA-nyń 100 jyldyǵyna arnalǵan markalar shyǵaryldy

ASTANA. QazAqparat - Mınskide Belarýs telegraf agenttiginiń 100 jyldyq mereıtoıyna arnalǵan poshta markalary shyǵaryldy, dep habarlaıdy BELTA.

Belarýstiń Baılanys jáne aqparattandyrý mınıstrligi búgin aınalymǵa «100 gadoў Belarýskamý telegrafnamý agentstvý» poshta blogyn shyǵarady. Blok A.T. Nepogodın atyndaǵy Bobrýı tıpografııasynda basyldy.

Joba Belarýs telegraf agenttigi yntymaqtastyqta ázirlengen. Blok jáne arnaýly shtempeldiń negizine BELTA-nyń 100 jyldyǵyna arnalǵan logotıpter alynǵan. Tırajy - 12 myń dana.

BELTA - eldegi eń iri aqparat agenttigi. Ol 1918 jylǵy 23 jeltoqsanda qurylǵan. Zań jaǵynan derbestigin saqtaı otyryp, uzaq ýaqyt Keńes Odaǵynyń Telegraf agenttigimen (TASS) úılesimdi jumys istegen.

1991 jyldan bastap BELTA egemen Belarýs Respýblıkasynyń aqparat agenttigi. Onyń ınternettegi saıty belarýs tilimen qatar orys, aǵylshyn, nemis, ıspan jáne qytaı tilderinde habar taratady.